DILI, STLNEWS.co – Subsidiu US$ 200 nee povu nia direitu duni, tanba nee husu ba governu atu prosesa lalais, sira neebe mak seidauk hetan naran tama iha faze reklamantes nee.
Kestaun nee fo sai husi reprezentante povu iha uma fukun Parlamentu Nasional, Deputada Elvina Sousa ba STL iha Parlamentu Nasional, Tersa nee (14/03/2023).
“Ita nia povu barak mak too oras nee seidauk hetan sira nia direitu ba subsidiu US$ 200, osan nee parlamentu aprova ona, no husu ba governu atu ezekuta tuir nia dalan, tanba faze reklamantes sira nee barak,” dehan Deputada PD nee.
Nia afirma, reklamantes barak mak seidauk hetan sira nia direitu, tanba nee husu ba governu atu halo verifikasaun ho didiak, ho nunee povu hotu bele hetan.
Iha fatin hanesan, Deputadu Fabiao de Oliveira hateten, povu iha Direitu tomak ba apoiu US$ 200 husi governu, tanba nee sira neebe seidauk hetan tenki nafatin hein, tanba governu sei halo verifikasaun didiak iha baze, atu nunee labele mosu problema ruma.
“Tuir informasaun katak, governu halo hela verifikasaun iha baze hodi responde ba maluk sira neebe naran la tama iha lista pagamentu, tanba nee fiar katak sei rezolve iha tempu besik,” dehan nia.
Nia afirma, governu seidauk halo pagamentu lalais ba reklamantes sira, tanba governu tenki verifika didiak lai iha baze, ema sira neebe la hetan nee naran lakon iha neebe los, nee tenki haree didiak hafoin halo pagamentu.
(mad)
