Suspende Atividade Arte Marsiais, Presiza Hadia Lei

DILI, STLNEWS.co – Xefe Bankada CNRT, Duarte Nunes hatete, governu suspende atividade arte marsiais presiza hadia lei, atu nunee situasaun lao hakmatek no kria estabilidade iha rai ida nee.

“Ita presiza hadia lei, lei seguransa nian, no lei arte marsiais nian, lei partidu politikus nian, buat sira nee ita halo pakote ida hodi halo revizaun ida, depois ita haree,” hatete Xefe Bankada CNRT, Duarte Nunes ba STL iha Parlamentu Nasional, Kuarta (29/11/2023).

Nia dehan, situasaun neebe sempre komplikadu iha rai ida nee, tanba koalia konaba estabilidade iha rai laran nee tenki koalia iha prioridadade hotu-hotu, laos ba arte marsiais deit, tanba laiha estabilidade, laiha dezenvolvimentu, laiha ema ida mak hakarak mai investe buat ruma iha Timor.

“Hau espera katak, governu fo atensaun espesial ba ida suspende atividade arte marsiais, no programa oinsa mak bele ultra pasa situasan sira hanesan nee. Ita tenki tuir governu nia hanoin, tanba presiza indetifika problema nee, tanba arte marsias no arte ritual nee kleur ona, tanba nee governu mai tenki ho dadus, atu nunee foti desizaun politika ida neebe los,” nia esplika.

Iha fatin ketak, Visi Primeiru Ministru no Ministru Kordenador Asuntu Dezenvolvimentu Rural, Mariano Assanami Sabino dehan, konaba antes nee iha ona desizaun katak, membru PNTL ho F-FDTL neebe involve iha arte marsiais atu halo juramentu, ida nee nia hanoin kompetensia ba Ministru Interior no portavos governu mak bele esplika.

“Maibe hau atu dehan, sidadaun hotu neebe sala tenki kumpri lei, laiha kor, laiha organizasaun, laiha partidu politiku i laiha relijiaun, se mak sala tenki hasoru tribunal, nee mak kompromisu”, nia deklara.

Nia esplika, juramentu ba instituisaun hotu ba povu tomak atu kumpri, luta nafatin hodi hakat nafatin, tuir asuwain nia ain fatin, neebe kumpri ba Maromak, atu leal ba estadu, nee mak juramentu, laos idak-idak, maibe laiha ema ida mak hamriik iha lei nia leten, hotu-hotu iha lei nia okos.

(jen)

LEAVE A REPLY

Please enter your comment!
Please enter your name here