DILI, STLNEWS.co – Prezidente Republika (PR) Jose Ramos Horta hatete, susu been inan 100% hodi fo nutrisaun diak ba kosok oan sira neebe foin moris too fulan 6.
Prezidente Republika Jose Ramos Horta hatoo kestaun nee ba jornalista sira, bainhira remata partisipa lansamentu nasional susu been inan ba labarik iha salaun MNEK, Segunda nee (17/04/2023).
Horta hatete, lansamentu nasional susu been inan ba labarik, eventu neebe mak importante tebes, tanba koalia atu tau matan diak liu tan ba kosok oan sira nia saude, tanba iha tinan barak iha Timor Leste laran tomak dala ruma uza razaun kultura, razaun saude, hodi la fiar inan nia susu been nudar hahan neebe mak diak liu ba kosok oan.
Maibe husi sientista sira hotu, doutor sira, governu, bainhira kosok oan moris too fulan 6 fo deit mak inan nia susu been.
“Inan nia susu been 100% kompletu nutrisaun oin-oin i hanesan mos antibiotik ida ka hanesan vasina ida ba saude nee, se kosok oan ida han no hemu deit mak inan nia susu been, fulan neen 6 nia saude sei diak, fulan 6 liu tiha mak tuir rekomendasaun husi doutor sira bele fo hahan seluk fali, maibe ba hahan kiik nia,” dehan PR Horta.
Prezidente Republika afirma, iha mos inan barak ladun rona imformasaun, entaun la hatene hodi fo fali formula ba labarik, formula nee perigozu tebes, tanba saida dala ruma inan aman laiha osan hodi hola, entaun sosa ida baratu no dala ruma prazu liu tiha no la hatene intrusaun no ladun fo nutrisaun bakteri ba labarik.
Xefi Estadu hatete, governu sei halo kampanha tun ba iha aldeia sira, eskola nomos liu husi media, no prezidente mos partisipa hodi apoiu kampanha edukasaun nee ba inan sira.
(eme/don)
