SUAI, STLNEWS.co – Membru komisaun jurisdisaun Partidu CNRT Natalino do Santos Nacimento hatete, problema importante neebe mak CNRT toka iha komisiu eleitoral mak setor justisa, iha neebe maun boot Kay Rala Xanana Gusmão hatete, bainhira CNRT manan sei reforma setor justisa no haree mos lei sira neebe governu atual sobu tiha hotu.
“Atu hadia setor justisa, ita presiza ema neebe iha patriotizmu no nasionalizmu, para bele hadia tiha lei hirak neebe gobernu atual sobu tiha no setor justisa presiza tau ema neebe profisional no independente, para garantia justisa nee ba ema hotu-hotu, nee hanesan hodi la haree ba koor no rasa. Aleinde nee fo mos kondisaun ba tribunais sira, tantu infraestrutura nomos kondisaun masima ba implementador lei nee sira haree liu ba sira nia profisaun,” dehan Membru komisaun juridisaun Partidu CNRT Natalino do Santos Nacimento ba STL, iha Ainaro, Domingu nee (30/4/2023).
Eis Deputadu CNRT nee afirma, sira neebe atu kaer kargu Prezidente Tribunal Rekursu no komisariu komisaun anti korupsaun, tenki halo teste psikolojia ba sira para antes atu asumi kargu para bele hili ema neebe profisional hodi lidera instituisaun sira iha setor justisa nian.
“Hau espera katak tenki halo duni, para depois bele haree ema neebe independente, imparsial neebe iha sentidu patriotizmu no nasionalizmu, atu bele lori orgaun ida nee bele halo fiskalizasaun ba aktu governu nian, karik akontese erru ruma, setor justisa bele implementa tuir lei,” hatete nia.
Nia hatete, governu de faktu labele halo, tanba sira neebe oras nee kaer ukun sira la hatene halo buat ida, programa VIII Governu laiha, durante tinan 5 nia laran sira gasta osan boot, maibe benefisiu ba povu laiha.
(cri)
