Tempu Ona Kurizi Aan, Nasaun Sai Saudavel

DILI, STLNEWS.co – Tempu ona atu ukun nain sira hotu kurizi aan hodi nasaun nee sai saudavel, nunee bele kompete ho nasaun sira seluk, laos eleisaun hotu kompete fali iha dapur deit.

Tuir Deputadu Bankada PD, Mariano Asanami Sabino katak, tempu ona para kurizi saida mak halo tiha ona. Kurizi laos tanba ba ukun ka laos ba ezekutivu deit, maibe kurizi ba instituisaun hotu, entaun kurizi ba ema ida pur ida, kurizi ba mentalidade, atitude nomos lalaok sira hotu.

“Para ita bele saudavel no ita nia nasaun forti, tanba tempu ona para ita haree TL ida neebe forti. Saudavel para ita bele kompete ho rai seluk, laos TL ida neebe eleisaun remata ita kompete iha dapur laran deit, maibe TL ida neebe tenki kompete ho rai liur,” dehan nia liu husi deklarasaun politika iha mandatu ikus ba V Lejislatura iha PN, Segunda (19/06/2023).

Nia afirma, bainhira atu kompete ho rai liur tenki fo espasu ba ema ka Timor oan hotu-hotu, ba partidu ida neebe mak manan ka la manan, nia vota ka la vota, ou kiik ka boot nia tenki espasu iha rai ida nee, ba partidu ida neebe mak lakon nia la lakon ninia sidadaun nomos nia responsabilidade ba nia rai ida nee mak tenki lao nafatin ba oin.

Nia konta, PD hamriik ho nia prinsipiu katak, ba o Timor Maubere oan prontu servi, entaun iha situasaun sira neebe difisil iha tinan 5 nia laran bainhira PD ho FRETILIN ukun monu iha dalan klaran, tanba la prienxe maioria parlamentar, maibe PD hamriik fila fali ho postura politika neebe diferente tebes. Nudar opozisaun fo afavor ba orsamentu estadu no programa hotu neebe mak aprezenta husi partidu koligasaun PLP, KHUNTO ho CNRT, bainhira iha situasaun neebe difisil iha mudansa AMP monu, PD nafatin hamriik fila fali ho kultura kontinua fo afavor ba OJE no programa governu nian neebe mak biabiliza husi Plataforma sira.

Nia afirma, atu deklara ba povu tomak neebe fo konfiansa ba PD, ami nain 5 tur iha PN politika ida nee ami foti, tanba TL iha situasaun neebe difisil, bainhira hau rasik deklara iha PN orsamentu nudar raan estadu, tanba nee labele hapara raan, atu raan kontinua halai.

Nia dehan, tanba situasaun 3 neebe difisil krizi ekonomia globar nomos krizi pandemia neebe mosu, inklui krizi politika neebe ita rasik mak koalia ho razaun 3 nee mak PD nia pozisaun neebe mak la tama governu, maibe fo ninia votus ba programa nomos orsamentu, ba buat kiik ida neebe PD halo mos ho responsabilidade.

Nunee mos Deputadu Xefi Bankada CNRT, Duarte Nunes hatete, atu halo refelesaun oituan ba iha periodu 5 anos iha V Lejislatura nian.

“Hau bele dehan senariu sira neebe mak mosu, periodu nee periodu ida neebe tristi tebes ba ami, tanba ami ho situasaun ida neebe dala ruma ita bele hanoin katak, planeadu karik maibe Partidu CNRT hanesan partidu neebe hetan konsikuensia boot iha periodu 5 nia laran. Hahu husi bainhira PR la fo pose ba membru governbu CNRT nian, i situasaun komesa dada too AMP fahe malu, ho situasaun nee ami aprende sai opozisaun iha buat barak, sai esperensia ida ba ami nia partidu, oinsa mak atu sai opozisaun ida neebe mak diak no ida neebe mak forti hodi halo balansu ho apoiu governu nian,” dehan nia.

Nia afirma, ho situsaun sira nee lori CNRT hola konkluzaun katak, iha buat ruma seidauk loos iha parlamentu, la haluha ba nasaun, entaun PN presiza hadia, tanba haree ba situasaun sira neebe mak mosu iha parlamentu depois mosu governu aitonka, depois laiha programa buat sira neebe halo iha tinan 5 nee nakonu ho asaun barak neebe la kontribui para atu dezenvolve demokrasia iha rai nee, hanoin ida nee sai reflesaun nomos esperensia ida neebe tenke aprende husi hanoin ruma, ba oin kontribui hodi jerasaun foun mai bele kontinua hodi lori nasaun nee ba oin.

Entretantu, Deputadu Bankada KHUNTO Luis Roberto hatete, KHUNTO tama iha PN iha V lejislatura ho kadeira 5 hetan mer no moruk iha fatin ida nee, mais iha nasaun demokrasia.

“Maibe ami ezije nafatin oinsa ita nia rai nee bele lao ho diak mak presiza atu hadai buat ruma, bankada KHUNTO apresia ba partidu politiku hotu-hotu. Hau fiar katak iha tempu pasadu ita hakilar malu, hatun malu no difama malu, husu hapara ona ho ida nee ba lejislatura foun neebe mai. Ita hakarak atu hanoin buat neebe foun, hodi hadia ita nia rain nee ba futuru ho diak, atu ita nia povu bele moris hakmatek livre, saudavel no nakonu ho edukativu, ida nee mak importante,” hatete nia.

Nunee mos Xefe Bankada Frenti-mudansa, Deputada Isabel Ximens hatete, intervensaun ikus iha mandatu V lejislatura iha uma fukun PN, primeriu agradesimentu wain ba Maromak tanba durante iha mandatu bele halo knar hotu-hotu lao ho diak, nomos ba uma lorik idak-idak nian, agradese mos ba kolega deputadu sira V lejislatura nian neebe hamutuk hahu iha tinan 5 ba kotuk halao jornada iha uma fukun ida nee.

“Liu-liu ba deputadu sira neebe marka espesial liu ba hau, primerio Deputadu Arao Noe nudar figura ida neebe hau hetan hanesan figura aman ida neebe hatudu nia exemplu lideransa, no hatudu nia figura extra ordinaria sempre ho hanoin nakloke tetu no sukat ho nia fuan boot, no deside ho nia fuan boot ba interese komum povu nian, nomos PPN atual Aniceto Guterres, hau aprende ser lider iha situasaun neebe kritiku no la fasil liu husi PPN nia lideransa durante tina ikus nee,” dehan nia.

Nia afirma, nomos ba Deputadu Mandati, hanesan mos figura profesor lingua Portuguesa ida inklui ba Deputadus sira seluk, no Deputada Terezina Viegas, Deputada Josefa nomos Deputada Fernanda Lay, nomos Deputada ba pesaol nudar mulher extra ordinaria, inklui mos deputadu sira seluk husu deskupla ba sala neebe iha.

Iha fatin hanesan, Prezidente Parlamentu Nasional (PPN), Aniceto guterres hatete, antes hau taka sesaun plenaria bankadas parlamentares hotu, ohin halo ona interevensaun despedida ba kinta-lejislatura, husi meza¸hau laiha buat ida atu hatoo. Iha primeira reuniaun iha sexta-lejislatura, hau sei hatoo hau nia intervensaun ikus liu, antes de halo transfensia meza ba VI lejislatura. Tanba plenaria ba ohin, hau sei la koalia buat ida,” hatete nia.

(dom)

LEAVE A REPLY

Please enter your comment!
Please enter your name here