DILI,STLNEWS.co – Timor oan labele sai hanesan kurtina hodi fasilita Xina loke kios iha Timor Leste, tanba tuir informasaun katak, lisensa neebe governu fo ba negosiu kiik sira nee, maioria Timor, maibe negosiu neebe lao, laos Timor oan mak halo, Xina sira mak halo fali, tan nee husu ba governu tenki toma atensaun ba asuntu nee, ho nunee labele taka dalan ba Timor oan sira.
kestaun nee fo sai husi Deputadu Fabiao de Oliveira husi Bankada FRETILIN ba STL iha Parlamentu Nasional, Tersa nee (11/04/2023).
Hau hanoin governu labele fasilita deit lisensa, maibe tenki halo mos kontrolu iha baze, atu nunee bele hatene lo-loos lisensa neebe Timor oan sira ba trata nee, sira mak uza hodi halo negosiu ka ou fo fali ba Xineza sira, karik fasilita Xina sira mak nee, atu taka dalan ba Timor oan sira neebe hakarak atu halo negosiu,” dehan deputadu nee.
Nia mos afirma, lei atu regula konaba asuntu nee iha ona, maibe dala ruma ninia implementasaun iha baze mak seidauk diak, tanba nee husu ba governu atu haree didiak fali lei nee, se lae mak Timor oan kontinua sai kurtina ba Xina sira, tanba lisensa ne’ebe sira ba trata nee uza Timor oan nia naran, maibe negosiu nee laos Xina mak hein fali kios nee, problema sira hanesan nee tenki haree didiak, tanba ema estranjeiru atu mai investe iha TL, nia tenki lori US$ 15 mill ba leten, laos mai atu loke kios hodi taka dalan ba Timor oan sira.
Tuir Deputadu nee katak, dala ruma Xina sira nee matenek, sira mai hola tiha feto Timor oan sira nee, atu nunee sira bele trata dokumentus hotu-hotu ho fasil, hafoin dokumentus iha ona Xina nia liman mak sira bele soe feto Timor nee, i balun uza Timor oan sira nia negosiu hodi loke kios iha rai laran, tanba nee husu ba governu atu haree didiak asuntu nee.
(dom)
