Tinan 21, Harii Estadu Ho Justu

DILI, STLNEWS.co – Iha tinan 21 nia laran, prosesu harii estadu demokratiku lao justu no funsional, ezije planeamentu tomak no la halo hakois arbiru, tanba Timor-Leste hahoris ho sistema multipartidariu loos no metin.

Sira neebe ukun órgaun saberania haat, Prezidénsia Repúblika, Parlamentu, Governu no Justisa, harii tuir Lei-Inan, idak-idak hala’o ninia knaar ho neon moos, la foti aan no servi ho laran tomak, hametin dame no estabilidade neebe presiza duni hodi bele harii estadu ho Administrasaun Publika, hakerek lejislasaun neebe presiza hodi hatuur Estadu Demokratiku.

Kestaun nee fo sai husi Prezidente da Republika Jose Ramos Horta liu husi diskusru iha selebrasaun ba loron restaurasaun independensia ba dala 21, iha Palasiu Prezidensia Bairu Pite, Sabadu (20/05/2023).

“Ita liu ona tinan 21 Timor-Leste iha dame no hakmatek, iha ita-nia leet rasik, ho ita nia vizinhu sira no mundu tomak, rai barak liu maka nuudar katóliku, haleu 98%, ema neebe lao ho fiar no moris diak ho protestante no musulmanu sira neebe ho fiar la hanesan, maibe hotu-hotu hamutuk ho identidade Timor nian, no hamutuk fó liman hodi harii ita-nia Estadu Demokrátiku,” dehan PR Horta

Tuir nia, hanoin, neebe iha imajen hodi hatebes, Timor-Leste iha tinan-1999, bainhira sidade Díli naksobu rahun, ho iis mutuk, sidade ida la haree manu liin ka manu neebe deit, tanba manu hotu-hotu semu lakonu husi ahi-suar iha fulan neeba ho naran Setembru-Metan.
 
“Bainhira hau hanoin hikas fali tinan 21 hori kedas restaurasaun independensia, hau koko haree rohan loos, no hau hanoin, bele haree nunee duni tanba hosi tinan 2012 to’o tinan 2022 hau la belit ho partidu polítiku ida, hau rai hela dadus estatístikus kona-ba tinan-1975 bainhira esperansa vida nian ba timor oan maka tinan 36.17 no númeru nee tun, tanba 33.78 iha tinan-1978, husi tinan-1980 esperansa moris ba timor oan diak ba daudauk hosi idade tinan 34.26 too idade tinan 50,”nia haktuir

Iha tinan-1999 esperansa vida mak idade ho tinan 58 fahe 59.55 ba feto no 56.58 ba mane, tanna nee, Tinan ruanulu hafoin restaurasaun independénsia, esperansa vida nian ba timor oan diak liu tan, idade ho tinan 69.26 ba mane, idade ho tinan 71.38 ba feto, neebé hatudu katak ema moris vida naruk liu tinan 12 no nee di’ak

TL hasouru kritiku barak husi, nasional no internasionl, no iha tinan-1999, hafoin TL sai husi fatuk rahun iha rain naksobu, lori hale’u tinan ruanulu hodi hamaran família timór nia isin kanek no hakman klamar, hodi halibur fila fali Nasaun ida neebe fahe tiha iha klaran.

Iha tinan sanulu nia laran tan sei hasouru dazafiu, risku, perigu oin-oin nomós oportunidade. Lider sira tenki hatene hili no haburas husi oportunidade, tan nee lider sira tenki hatene hili prioridade nasionál neebe boot no tau matan ba. Orden ekonómika mundiál iha osan-dolar nia mahon hasouru situasaun ida-ne’ebé Superpoténsia Ekonomika no Komersiál ne’ebé sosa no faan iha mundo tomak, domina sistema dijitalizasaun no iha ne’ebé halo dolar trilhaun la’o haleu mundu.

(mad)

LEAVE A REPLY

Please enter your comment!
Please enter your name here