DILI, STLNEWS.co – Diretor Ezekutivu FONGTIL Valentim da Costa Pinto afirma, iha priodu tinan politiku deputadu sira nudar kuadru politiku, iha kada partidu hotu tenki tun ba terenu, entaun fo afeta ba iha funsionamentu Parlamentu Nasional (PN) inklui governante tomak.
Valentim dehan, tempu kampanha nee iha duni preokupasaun, tanba kuaze atividade sira neebe mak bele funsiona hodi responde ba iha preokupasaun publiku nian iha duni problema, tanba membru PN kuaze hanesan kuadru politiku iha kada partidu hotu-hotu ba terenu hodi halo kampanha inklui governante tomak, nunee afeta oituan ba iha servisu atendimentu publiku.
“Lo-loos komisaun permanente sira envez funsiona hanesan baibain, maibe tan sira hanesan kuadru partidu politiku, entaun tun ba terenu hodi partisipa iha kampanha eleitoral, nunee afeta ba iha funsionamentu PN nian, mais ba ami tristi, tanba periodu ida nian, sira simu salariu karik nee saugati loos,” dehan Diretor FONGTIL nee ba STL Sabadu nee liu husi telefone (06/05/2023).
Nia afirma, tenki abandona sira nia servisu ba terenu partisipa kampanha eleitoral, i sira iha responsabilidade hanesan kuadru partidu neebe sira tenki ba, maibe lo-loos nee sira nia knaar hanesan reprezentante povu, tempu validu neebe mak sira halo molok sira nia lejislatura remata, lo-loos sira tenki halo servisu ba iha povu.
Nia tenik, hanesan problema neebe iha Ministeru Justisa too agora seidauk rezolve, konaba demanda publiku atu hetan pasaporte, tanba joven barak mak kandidatu ba trabalhadores atu sai ba rai liur, neebe tratamentu ba iha dokumentu sira hanesan nee tenki hein, tanba governu seidauk fo kontratu ba iha kompanhia sira neebe halo imprime konaba pasaporte nee.
(dom)
