DILI, STLNEWS.co – Bainhira Timor Leste (TL) adere ba Association of Southeast Asian Nations (ASEAN) sei dudu mos prosesu dezenvolvimentu, tanba sei loke merkadu livre.
Kestaun nee hatoo husi Prezidente Republika Jose Ramos Horta liu husi konferensia ho tema “Desafios e oportunidades num mundo fragmentado ou multipolarisado” iha Palasiu Prezidensial Bairu Pite, Kinta (13/04/2023).
“Timor Leste nia preparasaun adere ba ASEAN hahu kleur tiha ona, hahu kedas 2011, hanesan ita hatene hahu neineik, no ida nee responsabilidade Ministeriu Negosiu Estranjeiru nian, laos governu nia preokupasaun, uluk kedas Ministru Negosiu Estranjeiru mos koalia ho hau, sira hatete marka reuniaun ministeriu seluk la mosu no la marka prezensa, tanba la senti nee sira nia responsabilidade,” katak PR nee.
Prezidente Republika Jose Ramos Horta hatete, primeiru atu prepara adere ASEAN nee responsabilidade neebe boot tebes.
Xefi Estadu hatete, los duni haree didiak Kambodia tempu neeba Timor diak liu no sira dezenvolve diak bainhira tama ASEAN.
“Hau fiar ho difikuldade oin-oin ke ita bele iha, ita nia adezaun ASEAN sei dudu ita ba dezenvolvimentu, hau haree ezemplu uluk tinan 20 kuaze hela Estadu Unidos, tanba ita nia luta hau hela iha neeba, hau ba mexico dala barak, tanba konhese ema lubuk ida sempre konvida hau kada semana ba, dala ruma liu husi fronteira estadu Unidos Mexico,” katak nia.
Nia hatete, Timor Leste laos 100% prepara aan, tinan 10 tan mos seidauk 100%, maibe diak liu tinan 10 liu ba.
(eme)
