DILI, STLMEWS.co – Timor Leste (TL) nafatin fo nia solidariedade ba nasaun Myanmar nia luta hasoru injustisa hetan demokrasia.
Kestaun nee hatoo husi Minister Foreign Affairs NUG, Ms. Daw Zin Mar Aung, husi Myanmar ba jornalista sira, bainhira remata hasoru malu ho Prezidente Republika Jose Ramos Horta iha Palasiu Prezidente Bairo Pite, Segunda (03/07/2023).
Nia senti kontenti tebes hasoru Prezidente Republika, no nia vizita dahuluk mai Timor Leste hodi partisipa iha serimonia tomada de pose ba governasaun foun, ida nee hanesan esperiensia komum ida ba sira.
“Esperiensia boot ba hau nia moris hasoru líder revolusionariu Timor Leste nian, no fo mos esperiensia mai hau konaba hau nia vida polítika neebe uluk hanesan mos dadur ka prizioneiru polítika. Agora líder polítiku barak mak servisu no luta makaas ba igualidade jeneru, luta ba demokrasia no liberdade. Timor Leste nafatin hamriik no fo solidariedade ba Myanmar nia luta hasoru injustisa, tanba nee ami senti orgulhu hanesan povu hodi hasoru Xefi Estadu,” dehan nia.
Nia mos lori povu Myanmar nia naran hatoo agradese ba povu Timor Leste neebe fo solidariedade ba sira nia luta.
“Hau hodi Myanmar nia naran, agradese ba solidariedade ba povu Timor Leste neebe hamriik hamutuk ho povu Myanmar hodi luta ba justisa iha Myanmar. Ba Timor Leste nia apoiu no povu doben nia hospitalidade hodi fo kontribuisaun no solidariedade ba Myanmar nia luta, ami agradese no ba oin sei kontinua, nunee atu bele iha pas ba ema hotu-hotu iha mundu,” katak nia.
Iha biban nee, Prezidente Republika Jose Ramos Horta hatete, durante sira enkontru disksuti no troka ideia konaba buat hotu neebe akontese iha Myanmar, no Prezidente Republika hatudu laran diak, apoiu no luta neebe iha, oinsa bele servisu hamutuk iha nivel mundial no hatoo mos mensajen ba povu Myanmar, atu kontinua luta hasoru injustisa neebe iha.
(mad)
