DILI, STLNEWS.co – Governador Timor Leste (TL) iha Banku Mundial no Fundu Komentariu Internasional (WB/IMF), atual Ministru Finansas Rui Augusto Gomes, reprezenta Governu TL partisipa iha reuniaun Primavera Konselhu Governadores Grupu WB no IMF neebe realiza iha Washington DC, EUA, hahu husi loron 10 too loron 16 Abríl.
Liu husi komunikadu neebe STL simu Ministeriu Finansas Tersa nee (11/4/2023), hatete, tuir kalendariu governador Rui Gomes ho delegasaun TL sei halao reuniaun bilateral ho Xefe Foun Misaun Artigu IV, FMI ho nia ekipa. Iha reuniaun bilateral nee parte rua sei diskute konaba data fixu vizita Misaun artigu IV, FMI ba Timor-Leste neebe mak sei realiza iha Segundu Semestre 2023 hafoin TL realiza Eleisaun Parlamentar.
Governador Rui Gomes ho delegasaun mos sei halao reuniaun bilateral ho Visi Prezidente IFC hodi koalia konaba asistensia tekniku neebe mak durante nee IFC fo mai Governu Timor-Leste, partikularmente ba projetu sira estratejiku neebe ho modalidade Parseria Publiku Privada hanesan projetu Parseria Publiku Privada Portu Tibar, Projetu Redezenvolvimentu no Komersializasaun Portu Dili, Projetu Diagnostik Saude inklui Projetu Parseria Publiku Privada “Uma Kualidade ho Presu Asesivel ” neebe Governu konsidera nudar direitus umanu baziku no fundamental ba Timor oan nia saude no moris diak.
Iha ambitu reuniaun primavera 2023, delegasaun Timor Leste mos sei halao reuniaun bilateral ho Direitu Ezekutivu Banku Mundial Grupu Konstituente EDS21 neebe mak Timor-Leste no Portugal hola parte ba.
Aleinde nee, delegasaun Timor-Leste sei halao mos reuniaun bilateral ho Diretor Ezekutivu FMI Grupu Konstituente Brazíl neebe mak Paizes Membru CPLP hanesan Timor-Leste, Cabo Verde no Brazil hola parte ba. Ministru Finansas, Rui Gomes no Governador Banku Sentral Timor-Leste, Abraão de Vasconcelos neebe mos hanesan Governador Suplente Timor-Leste iha FMI sei reprezenta Timor-Leste hodi partisipa iha reuniaun altu nivel nee.
Nafatin iha ambitu Reuniaun Primavera nee, Delegasaun Timor-Leste mos sei partisipa iha Reuniaun Ministerial konaba “Dezenvolvimentu Umanu” iha neebe Governador Rui Gomes sei reprezenta Timor-Leste, hodi hatoo intervensaun konaba Dezenvolvimentu Umanu iha Timor-Leste, area prioridade importante ida husi Oitavu Governu Konstitusional neebe mak tau “EMA” nudar Sentru ba dezenvolvimentu.
Entre reuniaun altu nivel hirak nee, Governador Rui Gomes mos sei reprezenta Oitavu Governu Konstitusional hodi hatoo intervensaun iha Reuniaun Ministeriu entre Paises Membrus g7+ ho topiku, “Addressing Fragility and Conflict amid New Challenges”. Eventu nee organiza husi FMI servisu hamutuk ho Sekretariadu g7+ neebe lidera husi Sekretariu Jeral g7+, Helder da Costa.
Rekorda kada tinan, Oitavu Governu Konstitusionál lideradu husi Primeiru-Ministru, Jeneral Taur Matan Ruak aloka orsamentu milhaun US$ 1 ba Sekretariadu g7+ hodi apoiu g7+ nia servisu diplomasia iha nivel internasional halo advokasia konaba politika global hodi responde ba konflitu no frajilidade.
Iha loron 16 fulan Abríl, Governador Rui Gomes sei reprezenta Timor-Leste hodi partisipa no hatoo intervensaun iha Reuniaun Ministeriu entre Grupu Vulneravel 20 (V 20).
Durante partisipasaun iha Reuniaun Primavera nee, Governador Rui Gomes ho Delegasaun Timor-Leste hetan akompanhamentu husi Enkaregadu Negosiu Embaixada Timor-Leste iha Washington DC, Embaixador Antonio Araújo.
(cri)
