DILI, STLNEWS.co – Banku Sentral Timor Leste (BCTL – sigla portugues) deklara, hahu agora ba oin TL sei la hatama tan osan tahan US$ 1 ho US$ 5 mai TL, tanba banku hakarak halakon.
“Ita tenki halo lakon duni osan tahan US$ 1 ho US$ 5, tanba ita hakarak promove osan sentavu neebe iha sirkulasaun ekonomia, tanba ita transporta US$ 1 tahan ho US$ 5, nia kustu mai banku sentral boot tebes,” informasuan nee fo sai husi Governador BCTL, Abrão Vasconcelos iha Novu Turizmu, Kinta (10/08/2023).
Nia afirma, Banku Sentral tenki subsidiu ba ema idak idak neebe mak sei rai US$ 1 ho US$ 5 iha nia bolsu, tanba nee BCTL hanoin troka tiha osan tahan refere ba sentavu.
“Osan tahan US$ 10 too US$ 1000 ita kontinua promove iha rai laran. Ita halakon husi nota kiik, atu nunee ita promove ita nia osan sentavus neebe iha,” nia hatoo.
Tuir governador nee katak, too agora sirkulasaun osan dolar iha TL, tuir dadus estatístika kuaze atinje ona US$ 200.000.000, signifika osan fiziku ekonomia TL.
“Ita hakarak haree ninia montante lo-loos neebe mak ita tau iha sirkulasaun dezde inisiu too agora, nia montante boot, konserteza ida ne’e transforma sai depozitu, tanba nee maioria husi Cash neebe ita iha nee, transforma tiha ba depózitu bankaria,” dehan Governador BCTL.
Nia rekonhese transferensia osan sai ba rai liur montante boot, no osan neebe sai maioria selu sasan neebe TL importa mai, tan nee selu servisu neebe utiliza husi ema rai liur.
Osan neebe transfere ba liur nia montante boot, tanba haree ba dadus neebe husi BCTL publika ona nee indika katak, osan montante ida nunka menus husi bilhaun US$ 1 kada tinan, maibe ida nee laos buat ida la natural, no normal, tanba la produs tan nee, naturalmente tenki selu ho sasan hirak neebe TL importa mai, no osan sai mos tenki boot, tan nee osan neebe sai ona ba rai liur mais bilhaun US$ 1.
(mad)
