TL Tama ASEAN Komplikadu, Labele Demora Forma Governu

DILI, STLNEWS.co – Timor Leste (TL) tama ASEAN ajenda neebe mak komplikadu tebes, tanba nee labele demora ba formasaun governu, presiza lalais, nunee governu bele halo planu no programa.

Kestaun nee hatoo husi Prezidente Republika Jose Ramos Horta ba jornalista sira iha Palasiu Prezidente Bairo Pite, Tersa kalan (06/06/2023) hatete, hasoru malu ona ho Prezidente Parlamentu Nasional Aniceto Guterres, ema ida seriu kompotente, nia hanesan preokupadu los tempu neebe bele apertadu demais atu fo pose ba Parlamentu Nasional foun iha dia 12 nee kuaze imposivel.

Prezidente Republika hatete, tanba iha prosesu formal barak tenki kumpri no haree difisil los ba sira, entaun diak liu primeiru tenki kumpri lei dentru de 15 dias parlamentu foun tenki hahu servisu, kumpri ida nee 15 dias nia laran, entaun koalia ba iha bankada sira hotu liu-liu CNRT ho PD sira mak halo koligasaun, se parlamentu konkorda bele adia oituan invez dia 12 semana ida tan, PR laiha problema, maibe iha obrigasaun nasional nomos internasional.

“Ajenda ASEAN nia komplikadu tebes-tebes, ita labele demora iha formasaun governu, programa governu orsamentu ratifikativu depois impaktu ba buat barak, hau mos iha ajenda internasional, hau laos halimar ho buat sira nee, iha kompromisu nee mak halo investe tempu organiza, tanba nee laos konferensia NGO ruma,” dehan PR Horta.

Prezidente hatete, nia mos sei halo vizita ba nasaun Alemanha, kleur ona fulan neen nia laran trata ida nee nomos ba iha Inglatera, no foin daudaun hatama tan Fransa, eventu boot iha neeba sira konvida mos Prezidente iha loron 21 no 22 sei iha Fransa.

“Governu tenki forma antes, nunee programa governu nia tenki aprova, buat sira nee ita labele hanoin deit kestaun interna, maibe hanoin mos kestaun internasional impaktu boot ba ita, neebe buat nee mos kestaun interna, ASEAN kestaun nasional ida, laos deit kestaun internasional,” dehan PR Horta.

Prezidente akresenta, haree ba kestaun sira nee atu fo pose ba iha membru Parlamentu Nasional foun presiza lalais mak diak.

“Lalais liu mak diak, se bele halo iha dia 12 diak liu, importante mak halo iha prazu obrigatoriu lei nee dentru 15 dias hahu ohin dia 6 mais 15, se halo 21 tarde demais, entaun hau tenki haree sedu oituan, pelumenus 18 nunee tenki iha ona governu,” katak nia.

Aman nasaun nee hatutan, atu pose iha sa loron sei koalia ho partidu CNRT ho Partidu PD, depois mak sei koalia dala ida tan ho Prezidente Parlamentu, nunee mak sei haree loron neebe mak atu pose.

Prezidente Parlamentu Nasional Aniceto Guterres hatete, atu pose ba membru Parlamentu Nasional foun interpretasaun Prezidente Republika ho Prezidente Parlamentu Nasional la hanesan, maibe ba interese nasaun PPN konkorda ho interpretasaun PR nia, maibe nia sei koalia ho bankada sira hodi desidi fiksa data dentru.

(eme)

LEAVE A REPLY

Please enter your comment!
Please enter your name here