DILI, STLNEWS.co – Todung Mulya Lubis hanesan mos Senior Partner husi Indonezia no belun diak Prezidente Republika Jose Ramos Horta, senti haksolok bainhira Timor Leste (TL) atu adere ba ASEAN, tanba sei loke odamatan Indonezia no TL servisu hamutuk ba oin.
Todung Mulya Lubis hatoo lia hirak nee ba jornalista sira, bainhira remata enkontru ho Prezidente Republika Jose Ramos Horta iha Palasiu Prezidente Bairo Pite, Kinta (06/07/2023).
“Ami haksolok bele mai iha Timor Leste hodi hasoru malu ho Prezidente Republika Ramos Horta, hanesan mos belun diak neebe kleur ona hau konhese. Ami hatoo parabeniza ba formatu IX Governu neebe foin lalais simu ona pose, ami mos agradese ba Timor Leste, tanba bele hola parte ba adezaun ASEAN, nee hanesan loke odamatan ba TL ho Indonezia atu servisu hamutuk, dezenvolve TL no Indonezia ba futuru,” katak Todung.
Nia hatutan, iha hasoru malu nee koalia mos konaba Nahdlatul Ulama no Muhammadiyah atu kandidatu, hodi hetan mos Premiadu Nobel da Paz.
“Asuntu ba dala tolu hau mos hatoo ba Prezidente Republika nudar Premiadu Nobel da Paz, neebe apoiu kandidatu Nahdlatul ulama no Muhammadiyah atu kandidatu hodi hetan Nobel da Paz, ida nee PR halao beibeik ona, no PR mos kontinua apoiu kandidatu Nahdlatul ulama no Muhammadiyah, tanba sira rua mai husi Organizasaun Islam boot iha Indonezia neebe iha toleransia makaas,” katak nia.
Nia afirma, durante nee ema dun Islam involve iha tetorizmu, maibe agora hatudu ba mundu katak organizasaun boot rua iha mundu hodi kontribui unidade iha Indonezia, no hakarak pruralizmu iha Indonezia, asegura nafatin pas ho estabilidade nee importante, laos deit ba Indonezia, maibe mos ba ASEAN inklui TL.
(eme)
