DILI, STLNEWS.co – Timor oan 1000 resin servisu ilegal iha nasaun Korea, dala ruma tanba falta kontrola husi adidiu neebe governu tau ona iha Korea. Tanba nee, husu Sekretaria Estadu Politika Formasaun Profisionál no Empregu (SEPFOPE) no Ministeriu Negosiu Estranjeiru no Kooperasaun (MNEK) halo negosiasaun ho Embaixador Korea iha Timor Leste (TL).
“Ema 1000 resin sai ilegal iha ema nia rai Korea, dala ruma tanba falta kontrolu husi adidu sira. Lo-loos nee kada semana adidu tenki tun ba kontrola nia ema, atu nunee traballador sira nee metin iha dalan legal, laos sai ilegal,” kestaun nee fo sai husi Deputadu Fabiao de Oliveira ba STL iha PN, Kuarta nee (22/03/202).
Nia katak, trabalhador sira nee ba servisu iha ema nia rai, tanba kooperasaun Governu TL ho Korea, tan nee atu hametin diak liu tan kooperasaun nee, governu TL liu husi MNEK hamutuk ho SEPFOPE atu buka solusaun ba trabalhador rihun 1 resin neebe sai ilegal iha ema nia rai, ho nunee Timor oan sira nee labele iha risku ka ameasa nia laran, tanba lei Korea rigorozu tebes.
Governu tenki buka lalais solusaun ba trabalhador sira nee, tanba sira ba servisu iha ema nia rai lori nasaun TL nia naran, no sira mos kontribui reseita mai kofre estadu, tan nee atu labele lori risku ba Timor oan sira, mak MNEK hamutuk ho SEPFOPE buka Embaxada Korea nian iha TL, halo took negosiasaun ruma, atu nunee labele lori risku ba Timor oan rihun 1 resin neebe konsidera ilegal iha Nasaun Korea.
(mad)
