DILI, STLNEWS.co – Governu Timor Leste (TL) tenki halo nafatin negosiasaun ho Governu Korea, atu nunee joven sira neebe sai husi TL ba servisu iha ema nia rai labele sai ilegal, tanba tuir publikasaun neebe media nasional sira fo sai katak, Timor oan rihun 1 resin sai ona ilegal iha Korea.
Kestaun nee fo sai husi Visi Prezidente Parlamentu Nasional, Luis Roberto ba STL Tersa (21/03/2023) iha PN.
“Ita husu ba governu atu halo nafatin negosiasaun ho governu Korea, ho nunee Timor oan sira neebe sai husi TL liu dalan legal bele servisu legal nafatin iha ema nia rai, labele sai ilegal, ema kaer toman ita, ema deporta fila fali mai TL,” preokupa visi nee.
Nia katak, atu labele sai risku ba trabalhador sira, mak diak liu labele sai ilegal iha ema nia rai, tanba nasaun ida ba tan nasaun ida tenki iha nia regulamentu, no haree ba Lei Governu Korea nian rigorozu los, tan nee husu nafatin ba governu atu kontinua tau matan ba Timor oan sira neebe ba servisu iha ema nia rai, tanba sira mos kontribui reseita ba kofre estadu.
(mad)
