DILI, STLNEWS.co – Governu presiza hakbesik aan ba komunidade liu husi trata sertidaun RDTL ho Bilheti Identidade (BI) iha postu no suku sira.
Preokupasaun nee hatoo husi Deputadu FRETILIN, Dário Madeira iha Parlamentu Nasional, Sesta nee (22/07/2022).
“Ami husu governu diak liu hakbesik aan ba komunidade sira iha suku no postu, atu nunee idozus, estudante, inklui komunidade hotu bele asesu,” katak deputadu nee.
Tanba tuir nia, agora nee komunidade sira susar atu asesu ba trata sira nia BI ho sertidaun RDTL, tanba nee presiza tebes prezensa governu nian iha nivel postu no suku, hodi komunidade sira fasil trata sira nia dokumentus.
Entretantu, relasiona ho kestaun nee, jornalista sira koko konfirma ho Ministru Justisa Tiago Sarmento, maibe ministru hatete nia parte la fo komentariu, tanba konaba atendimentu ba trata dokumentus sira nee, bele ba konfirma ho diretor sira.
(gui)
