DILI, STLNEWS.co – Prezidente Universidade SEHAN Korea do Sul sei rekruta estudante Timor oan nain 100 neebe mak iha valor diak husi sekundaria, hetan bolsu estudu hodi ba estuda iha Korea.
Informasaun nee hatoo husi Prezidente Universidade SEHAN Korea do Sul, Yi Sunghoan ba jornalista sira, bainhira remata hasoru malu ho Prezidente Republika Jose Ramos Horta iha Palasiu Prezidente Bairo Pite, Segunda (10/07/2023).
Nia hatete, sira sei rekruta estudante sekundaria neebe valor diak hodi bele ba estuda iha Korea.
“Ami sei rekruta estudante neebe valor diak, nunee sira bele hetan bolsu estudu, ami mos hakarak redus todan ba estudante sira konaba problema finansa, no sira hakarak estuda ami prontu simu,” dehan nia.
Prezidente Universidade SEHAN hatete, sira konkorda konaba husu atu apoiu Timor oan sira, nunee mos programa apoiu estudante sei implementa tinan nee.
“Ami husu ajuda ba ita boot sira atu promove ida nee, no ita foti programa primeira pasu neebe mak diak,” katak nia.
Yi Sunghoan hatete, sira sei halo esforsu tomak konaba programa edukasaun ida nee, hodi bele promove relasaun diak ho Timor-Leste.
Nia hatutan, agora daudaun sira prontu simu estudante neebe mak remata ona iha nivel sekundaria ho valor diak, hodi bele ba eskola iha universidade refere.
“Agora daudaun ami prontu simu estudante neebe foin remata eskola iha ensinu sekundariu, sira bele ba, maibe sua Exelensia Prezidente husu estudante sira neebe estuda hela iha Korea nee, se karik sira hakarak trensfere bele ka lae, ida ne ami sei hanoin no koko atu halo tuir saida mak prezidente husu,” katak nia.
Iha biban nee, Prezidente Republika Jose Ramos Horta mos husu ba Prezidente Universidade SEHAN Korea do Sul ho ekipa hodi tau matan mos estudante neebe mak eskola iha Korea do Sul.
Programa husi Universidade SEHAN Korea do Sul, neebe atu rekruta Timor oan sira. PR Horta hakarak fo motivasaun ba estudante sira atu estuda makaas ho valor diak, nunee bele halao estudu iha Korea.
(eme)
