USAID Apoia Milhaun US$ 18 Ba Parseria Sustentavel

DILI, STLNEWS.co – Estadu Unidus liu husi ninia Ajensia Internasional ba Dezenvolvimentu (USAID) no Governu Timor Leste asina akordu, atu oferese tan milhaun US$ 18 resin ba inisiativa foun dezenvolvimentu neebe dezena, atu reforsa setor laos-petrolíferu Timor-Leste nian, no hametin governasaun diak, hodi kria kondisaun ba dezenvolvimentu inkluzivu prosperu no futuru ida ho auto-sufisiensia.

Liu husi komunikadu neebe STL asesu Kinta nee (18/05/2023) katak, ida nee hanesan faze daruak husi fundu neebe preve ona orsamentu ida ho valor milhaun US$ 92,3 liu husi akordu objetivu Dezenvolvimentu (DOAG), nuudar parte ida husi USAID nia Estratejia Kooperasaun ba Dezenvolvimentu Nasaun ba tinan lima nian too Dezembru 2025.

Ministru Finansa Timor Leste , Rui Augusto Gomes no Diretora Misaun USAID, Zema Semunegus asina ona akordu nee, reprezenta pasu importante hodi avansa dezenvolvimentu Timor Leste nian.

“Estadus Unidus iha kompromisiu atu hametin ami-nia parseria ho Timor-Leste iha tempu neebe ita serbisu hamutuk hela hodi promove rekuperasaun ekonomika pos-pandemia no ekonomia Timor-Leste nian ida neebe diversifikadu liu no inkluzivu. Liu husi USAID nia programa foun hirak ne’e, ita sei harii kolaborasaun iha dekada rua nia laran hodi ajuda setor privadu no sosiedade sivíl sira sai buras liu tan,” dehan Enkaregadu Negosiu Estadus Unidus, Thomas Daley.

DOAG mak dokumentu tinan lima nian ida neebe deskreve komitmentu EUA nian ba dezenvolvimentu Timor-Leste nian liu husi USAID. Tinan-tinan, Estadus Unidus aumenta fundu foun ba DOAG; no bazeia ba akordu nee, Governu Timor-Leste mos sei kontribui ninia fundu no rekursu sira atu apoia atividade dezenvolvimentu nasional.

“Faze foun ida iha ita nia parseria ne’e, sei harii bazeia ba susesu sira anterior nian, hodi kontinua apoiu reforma aduaneira, fortalese setor privadu, partikularmente ba atividade sira ne’ebé relasiona ho agrikultura ninia kadeia valor no turizmu, no haklean apoiu USAID nian ba setor saude ne’ebé importante tebes,” dehan nia.

Nunee mos Ministru Finansa, Rui Augustu Gomes agradese Estadus Unidus Amérika no Amerikanu sira ba sira nia apoiu konstante no espera atu hametin parseria hodi hadiak Timoroan sira nia moris liu husi faze foun parseria nee nian.

“Inkluzividade, prosperidade no saude mak elementu xave sira husi ami nia estratejia no sei guia projetu sira hotu ne’ebé ami deseña hodi apoia Timor-oan sira no governu,” dehan nia.

Nunee MOS Diretora Misaun USAID, Zema Semunegus hateten, “ami sei konsentra ba maneira sira hotu atu hametin nasaun ne’e ninia auto-sufisiénsia hodi buka oportunidade atu empodera joven sira, feto sira no populasaun marjinalizadu sira ho abilidade atu bele partisipa no hetan benefísiu husi kresimentu ekonómiku Timor-Leste nian hodi hadiak moris ema hotu nian,” nia tenik.

Objetivu jerál husi USAID nia estratéjia ba tinan lima ho finansiamentu neebe inklui iha akordu neebe ohin asina, atu ajuda Timor-Leste ida neebe inkluzivu, prosperu, saudavel no sufisiensia liu tan. Atu atinje ida neee, USAID nia estratéjia mak sei haforsa sistema no governasaun saúde, fornese formasaun abilidade, promove tékniku agríkula ne’ebé adapta ba klima no hakbiit joven no lider lokal sira atu haforsa adaptasaun ba klima no reziliénsia iha nivel komunidade lokál. Estratéjia nee fo énfaze makaas ba aumentu oferta no prokura ba traballador kualifikadu no mós fó prioridade ba efetividade Governu nian iha servisu públiku sira, instituisaun sira, responsabilidade no transparénsia ho envolvimentu ativa husi organizasaun sosiedade sivíl sira. Liu husi inisiativa ne’e, USAID sei apoia Timor-Leste nia Planu Estratéjiku Dezenvolvimentu iha área prioridade tolu: kapitál sosiál, infraestrutura, no dezenvolvimentu ekonómiku.

(dom)

LEAVE A REPLY

Please enter your comment!
Please enter your name here