DILI, STLNEWS.co – Sura loron partidu poliku sira sei halao kampanha eleitoral, tanba nee veteranus husu partidu poliku sira labele insulta no hatun malu, hodi hatudu ezemplu diak ba jerasaun foun.
Tuir Veteranus Ete-Uco Guterres katak, hatun malu, insulta malu, ida nee mak problema durante nee sempre akontese iha Timor, la hatene too bainhira mak sai maturidade iha politika, i hatudu unidade ba iha interese nasional, hodi halao dezenvolvimentu.
Partidu poliku kontinua hatudu liman ba malu, katak ida nee la diak, ida neeba la diak, ida nee mak problema politiku iha Timor.
“Ita laos labarik loron kalan insulta malu, hatun malu, tuir loos ita tenki hatene, oinsa hanesan ema politiku iha maturidade, unidade hodi halao dezenvolvimentu ba rai ida nee no lori povu ba moris diak, no sai mos ezemplu diak ba jerasaun foun sira”, hatete Veteranu Ete-Uco Guterres ba STL iha nia knaar fatin, Balide, Segunda nee (10/04/2023).
Nia dehan, hanesan ema politiku diak liu mai prepara aan organiza malu, mezmu diferensa politika, maibe labele hatun no insulta malu, katak ida nee mak diak ida neeba la diak, nee lakon tempu deit.
Nia katak, haree governasaun ida nee ukun diak, governasaun seluk mai fo kontinuasaun, laos ida sae halao, ida seluk sae fali sobu, ida nee laiha alternativau ba moris diak povu nian no sei la eduka jerasaun foun sira.
Entretantu, Xefi Bankada CNRT Duarte Nunes hatete, iha kampanha atu ba faan programa ba povu hodi hetan konfiansa husi povu, laos ba hatun malu ho insulta malu. Neebe depende ba partidu idak-idak nia regulamentu oinsa atu labele insulta malu, maibe nee fila ba idak-idak nia konsiensia oinsa atu labele koalia provoka malu iha tempu kampanha.
Nunee mos Xefi Bankada KHUNTO, Olinda Guterres hatete, buat ida hatun malu no insulta malu nee la diak, Partidu KHUNHO nia hakarak nee atu unidade hodi haree ba povu no nasaun ida nee, oinsa mak lori povu ba moris diak.
Tanba nee, KHUNTO sempre buka oinsa atu labele hatun malu, bele hatun malu maibe iha palku leten bainhira tempu kampanha, laos ba iha fatin-fatin hatun katak partidu ida nee la diak, tenki vota ba partidu ida nee, ida nee laos eduka povu sira.
(gui)
