DILI, STLNEWS.co – Iha tempu kampanha veteranus sira labele hamriik iha Xanana, Mari ho Taur nia kotuk hodi insulta fali lider sira seluk,hein katak iha momentu ida sira sei hamutuk lori moris diak ba povu no rai ida nee.
Kestaun nee hatoo husi Kordenador Movimentu Progresista Timor Leste, Rogerio da Cruz ba STL iha nia hela fatin Mas Lidu, Tasi Tolu, Dili, Domingu nee (09/04/2022).
“Mezmu lider sira nee iha difirensia politika, maibe ida nee normal iha vida politika, maibe ita husu veteranus sira labele hamriik iha Xanana nia kotuk hodi trata Mari, labele hamriik Primeiru Ministru Taur nia sorin hodi trata Xanana iha tempu kampanha, ita hein katak iha momentu ida lider sira nee sei tur hamutuk hodi hanoin ona ba futuru atu lori moris diak ba povu iha rai ida nee,” dehan Rogerio.
Nia katak, uluk iha tempu funu luta ba libertasaun rai ida nee, sira haree malu diak tebes, bainhira Timor ukun tiha aan no hetan tiha independensia sira haree malu la diak.
“Dinamika politika neebe daudaun nee lao iha ita nia rain, ita tenki kalma hodi akopanha nafatin, ita labele pesemis ba situasaun sira neebe akontese iha Timor. Lider sira neebe daudaun nee halo politika sira mesak ita nia aman sira neebe uluk oferese aan hodi luta ba libertasun rai ida nee,” hatete Rogerio.
Nia afirma,mezmu sosiedade sira nia haree lider sira lakohi fo liman ba malu hodi promove dialogu, halo ema hotu senti lamenta tebes.
Entretantu, estudante Universidade da Paz, Jose da Costa haktuir, daudaun nee publiku hotu hatene Xanana Gusmao no Taur Matan Ruak, Lu Olo, Mari Alkatiri haree malu la diak, maibe nee sira nia problema, nudar sidadaun ida neebe diak labele halo intervensaun, mezmu lider sira la gosta malu.
“Ita haree iha konsolidasaun Avo Nana hatete, Mari Alkatiri, Primeiru Ministru Taur Matan Ruak haree maun boot Xanana la diak, maibe nee sira nia problema, hanesan sidadaun ida ita husu deit mak lider sira tenki hamutuk atu lori nasaun nee ba oin para povu bele moris hakmatek,” nia afirma.
Tanba nee, husu ba lider tuan sira hatudu ezemplu neebe diak ba povu, mezmu iha diferensa ideas, maibe ba asuntu nasional lider sira tenki hamutuk.
(cri)
