DILI, STLNEWS.co – Bankada CNRT iha uma fukun Parlamentu Nasional (PN) afirma, viajen Prezidente Republika (PR) Jose Ramos Horta ba estranjeriu, ho objetivu hakarak hadia imajen Estadu Timor Leste nian, hodi fanu fila fali relasaun diplomatiku ho nasaun sira seluk.
Visi Prezidente Bankada CNRT, Patrocino Frnandes hatete, preokupasaun bankada FRETILIN ho PR nia viajen bele iha razaun atu tau iha diskusaun publiku, maibe PR ninia servisu sira sai ba liur mos importante ba nasaun TL, lei no konstituisaun mos fo dalan.
“Atividade ka planu neebe PR nian halo sai ba liur ho intensaun ka objetivu, atu hadia fila fali imajen ita nia pais no estadu nian. Neebe hau hanoin sira nia preokupasaun pertinente atu loke publiku nia hanoin, mais la signifika PR sai ba liur nee, tanba gosta sae deit aviaun ou tur iha kadeira aviaun. Linguajen sira hanesan nee, bainhira hasai presija kuidadu, tanba bele implika fali ba ita nia nasaun, nia relasaun diplomatika ho nasaun sira seluk,” dehan nia ba STL iha PN, Segunda (04/09/2023).
Nia haktuir, PR halao servisu tuir mandadu konstituisional, no keta haluha katak, husi 2017 mai leten relasaun diplomatika ho nasaun sira seluk laos laiha, iha maibe iha komunikasaun nee mak ladun diak, tanba problema politika iha rai laran.
Nia tenik, PR aleinde nia nudar Xefi Estadu ba nasaun TL, nia mos nudar Xefi Diplomata neebe bele enkoraja, diplomata sira hotu iha pais sira seluk oinsa mak halo komunikasaun politika diak.
Nia hatuir, bainhira TL hetan ona simpatia husi nasaun sira seluk mak, laos deit ninia implikasaun ba iha relasaun diplomatika, maibe iha ninia implikasaun ba relasaun ekonomiku iha TL.
(dom)
