Virus Pneumonia Misterius Hahu Fo Ameasa, PN Husu Halo Vijilansia Sidadaun Xineza

DILI, STLNEWS.co – Deputada Bankada Partidu CNRT, Maria Bareto hateten, virus pneumonia misterius hahu fo ameasa ba nasaun Xina. Tanba nee, nia husu ba governu liu-liu Ministeriu Saude atu halo vijilansia ba sidadaun Xineza neebe tama mai Timor Leste.

“Hau hakarak levanta asuntu ida konaba saude mundial, liu-liu situasaun neebe oras nee akontese iha nasaun Xina neeba, neebe mosu tan fali ona virus foun ida Pneumonia Misterius neebe sei akontese hanesan virus pandemia Covid-19, katak sei halai liu ba iha ema nia respirtatoriu,” hatete Deputada Maria Bareto liu husi plenaria Parlamentu Nasional, Segunda (27/11/2023).

Nia hatutan, governu liu husi Ministeriu Saude tenki halo vijilansia makaas ba sidadaun Xinesa sira neebe tama mai Timor Leste, liu husi ekipamentu escreaning neebe oras nee estabelese ona iha aeroportu internasional nomos fronteira sira, tanba Virus Pneumonia Misterius oras nee akontese iha nasaun Xina, barak liu afeita ba labarik sira nia respiratoriu no hospital sira neebe mak iha neeba oras nee nakonu ona ho pasiente sira.

“Hau nia preokupasaun mak nee senhor Visi Primeiru Ministru, ita haree ba situasaun neebe oras nee akontese katak iha mos vizitor barak husi nasaun Xina mai Timor Leste, nomos Timor oan sira neebe ba nasaun Xina, ita presiza atu kuidadu ho situasaun ida nee para labele afeita too mai ita nia rain,” tenik nia.

(dom)

LEAVE A REPLY

Please enter your comment!
Please enter your name here