Vizita Alemanha, Koalia Asuntu Nivel Global Rejional

DILI, STLNEWS.co – Prezidente Republika Jose Ramos Horta Vizita ba Republika Alemanha, hodi koalia konaba asuntu nivel Global Rejional.

Preszidente Republika Jose Ramos-Horta sei halao vizita oficial ida ba Berlin, Republika Federal Alemanha, husi loron 25 too 26 fulan Junhu tinan nee.

Vizita ida nee mai iha serkunsia ba konvite neebe hatoo husi Prezidente Alemaña, Frank Walter Steinmeier, iha inísiu tinan 2023.

Iha Berlin, Prezidente Republika José Ramos Horta sei halo enkontru bilateral ho ninia omologu ho mos Chanceler Olaf Scholz, Xefe Governu Alemanha nian.

Liu husi komunikadu husi media PR Sabadu nee (24/06/2023) hatete, iha enkontru bilateral rua nee líder sira sei koalia kona-ba situasaun principal sira neebe akontese iha nível global no rejional, nunee mos Prezidente Jose Ramos Horta sei atualiza ba Prezidente Frank Walter Steinmeier no Chanceler Olaf Scholz situasaun Timor-Leste nian, liu-liu konaba hafoun hikas proposta kooperasaun entre rai rua nee.

“Alemanha nudar ekonomia boot liu iha Europa, importante tebes atu Timor-Leste sai nudar rai ida neebe prioriedade liu ba nia,” haktuir Xefe Estadu.

Xefe Estadu akresenta tan katak, daudaun nee Alemanha ho Timor Leste iha hela komunikasaun namanas atu reformula kooperasaun alemanha liga ho envíu ka haruka trabalhador Timor oan sira ba servisu iha Alemanha.

Prezidente haklean tan katak, eminente adezaun Timor-Leste nian ba ASEAN, neebe posibilita asesu ba merkadu ida ho ema hamutuk 700 milloens, sei loke oportunidade ideal ba industria Alemanha atu estabelese iha Timor-Leste, iha área espesializada sira.

Prezidente Republika iha vizita ho durasaun menus husi oras 48 iha Berlim, sei akompaña husi Embaixador Timor-Leste nian ba Uniaun Europeia no mós Konsul Jeral Honoráriu Timor-Leste nian iha Berlin.

Viajen neebe halao ba Kontinente Europeiu, iha ajenda foufoun atu inkui mos partisipasaun Prezidente Republika nian iha Cimeíra “New Global Finance” konvite husi Prezidente Frances, Emmanuel Macron, entre loron 21 too 23, fulan Junhu, maibe partisipasaun refere kansela hikas tanba koinsidensia ho falesimentu Dra. Isabel Ferreia, espoza husi Primeiru Ministru Taur Matan Ruak.

Ho vizita ida-nee, Prezidente José Ramos Horta reafirma ninia empenu konaba dezenvolvimentu no fortalesimentu kontínua ba lasus kooperasaun entre rai rua nee iha futuru.

Tuir ajenda, Prezidente Republika sei sai iha loron 24 fulan Junhu no sei fila hikas mai Dili prevista iha loron 28, fulan Junhu tinan 2023.

(dom)

LEAVE A REPLY

Please enter your comment!
Please enter your name here