DILI, STLNEWS.co – Tuir Prezidente Komisaun A neebe trata asuntu Konstituisionais no Justisa, Joaquim dos Santos hatete, relasiona ho vizita Prezidente Republika (PR), Jose Ramos Horta, ba iha Nusa Tengara Timur (NTT) hatudu figura la diak ba Timor Leste (TL).
“Figura la diak ba TL, kuandu PR ba vizita fali iha aldeia ida, depois ita nia ministru ida mos la ba tan no la hatene ministru husi Indonezia nian mos akompanha ka lae. Tuir lo-loos entre prezidente ho pezidente, asuntu saida deit koalia iha nivel prezidente, laos ba too fali iha aldeia ida no hanesan nee Prezidente Republika halo moe ita deit, i hau la tama iha ninia asuntu mais atetude ida nee hau la konkorda,” dehan nia liu husi plenaria iha Parlamentu Nasional, Tersa nee (02/08/2022).
Nia tenik, tanba nee husu ba Sekretariu Estadu atu haree asuntu ida nee, se bele revoga lai lei protokolu subtansia balun ba iha lei protokolu estadu nian, nee tenki hadia.
Aleinde nee, Visi Prezidente Bankada CNRT, Patrocino Fernandes dehan, relasiona ho vizita PR nian, nia parte la koalia barak.
“Hau la koalia barak, mais hau konkorda deit saida mak Deputadu Joaquim hatete, presiza karik halo alterasaun ruma ba iha lei protokolu estadu nian,” hatete nia.
(dom)
