LAUTEM, STLNEWS.co – Eis Prezidente Timor GAP, Francisco Monteiro hatete, iha tinan barak nia laran CNRT nia ukun, halo esforsu makaas atu dada kadoras mai Timor Leste, maibe iha parlamentu rasik mak vota kontra, ida nee konsidera sira laiha interese nasional.
“Iha tinan barak nia laran, iha CNRT nia ukun, ita halo esforsu hotu-hotu atu dada kadoras mai Timor Leste, maibe iha parlamentu sira rasik mak vota kontra tiha, ida nee ita konsidera sira laiha interese nasional hodi dada kadoras mai Timor Leste,” dehan Fracisco Monteiro durante kampanha CNRT iha Kampu Eis Kampu 745 Lospalos, Tersa nee (25/4/2023).
Nia dehan, prosesu negosiasaun tomak ba fronteira tasi neebe Xefe Negosiasaun Fronteira Maritima, Xanana Gusmão defende too hetan nia rezultadu, nee ba interese nasionál, no lo-loos partidu politikus hotu-hotu tenki apoia esforsu Xanana.
“Fronteira maritima ita nia maun boot negosia ho difisil tebee-tebes, mais ita hetan tiha ona ita nia fronteira, tasi ida ke luan tebes-tebes, iha parte ida iha mundu nasaun balun negosia ho tinan 40 ka 50 mak foin hetan rezultadu, mais iha Timor ita negosia iha tinan ida ho balun nia laran deit. Ema sira neebe dehan Xanana bosok nee, sira la hatene prosesu nee, ka dukur hela karik, aleinde iha ema balun mos dehan sira hakarak dada kadoras mai Timor, maibe iha sira nia tempu tinan barak sira husik tiha kadoras Bayu Undan ba Australia,” hatete nia.
Nia hatutan, CNRT hakarak dada kadoras mai Timor Leste bele kria industria barak-barak ba Timor oan sira hodi hetan servisu kontribui ba ekonomia TL.
Iha biban nee, eis Lideransa Timor GAP nee husu ba militante no simpatizantes Partidu CNRT, se hakarak kadoras mai TL, vota CNRT.
“Se imi hakarak lori Maun Boot Kay Rala Xanana Gusmão ba Primeiru Ministru, 21 Maiu vota ba CNRT, vota ba númeru 12, nunee maun boot ba kaer ukun bele lori kadoras mai Timor Leste. Lori kadoras mai Timor ita bele dehan ne’e hanesan salvasaun ekonomia ba ita nia nasaun,” tenik nia.
Fransisco hatutan, partidu sira ne’ebé kaer ukun sira hatene mak hasai osan, no hanoin nakukun oinsa mak bele hatama osan.
“Partidu neebe kaer ukun daudaun nee, sira hatene mak hasai osan, maibe seidauk halo buat ida atu asegura kadoras mai Timor -Leste hodi hatama fila fali osan ba fundu petrolifeiru. Fundu petrolifeiru agora hela deit US$ 17 bilhoens,” tenik nia.
Tuir nia predisaun katak, iha tinan 8 nia laran mak laiha dezenvolvimentu seluk, nasaun Timor-Leste ninia finanseiru sei bankrota. Tanba partidu sira neebe kaer ukun la hatene halo jestaun no maneija fundus Timor-Leste.
Iha fatin hanesan, Oan Mane husi Saudozu Komandante David Alex Daitula, Alarico Daitula JR husu ba kamarada Lautem oan sira neebe too agora sei dada Bandeira FRETILIN iha uma oin, tenki halo reflesaun hodi labele kontinua kumu liman mamuk, maibe tempu too ona fó votus ba CNRT.
“Hau husu ba kamarada sira neebe sei dada bandeira mean iha imi nia uma leten, rona didiak, imi uluk mate no terus no imi nia familia nia oan neebe mate husik hela imi laos tanba bandeira, maibe tanba atu liberta patria ida nee. Bandeira nee hanesan intrumentu funu nian, tanba nee imi labele ridikal liu ba mate iha bandeira hun, maibe imi hadomi imi nia rain, atu rai nee labele monu tan ba susar,” dehan Alarico.
(cri)
