Votus Tun Lisaun Ba PLP, La Hadau Koligasaun

DILI, STLNEWS.co – Rezultadu eleisaun parlamentar, votus partidu PLP menus sei la sai obstakulu, maibe sai lisaun ba futuru. Enkuantu PLP la hadau malu ba koligasaun ho CNRT hodi forma IX Governu.

Deklarasaun nee hatoo husi Visi Prezidente Conselho Politika Nacional (CPN) PLP atual Deputadu Francisco Vasconcelos katak, povu desidi partidu se deit ba ukun reprezenta ema hotu, importante garante governasaun diak, dezenvolvimentu diak ba sidadaun hotu. Nee mak objetivu ba ukun, tanba ukun nee responsabilidade.

“Povu la hili PLP la signifika katak PLP ukun la diak ka komete kazu korupsaun, maibe nee sai hanesan lisaun ba PLP iha futuru”, katak Visi Prezidente CPN PLP atual deputadu Francisco Vasconcelos ba STL Tersa (23/05/2023) iha PN.

Nia dehan, partidu se deit ukun importante jere rekursu ho diak, nunee garante dezenvolvimentu ba povu. PLP votus menus laos tanba ukun la diak ka laos tanba estrutura baze la metin, maibe atu hatete deit estrutura husi nasional too baze esforsu hotu, harii estadu ida nee agora lao too mai too ona iha IX Governu.

Durante ukun estadu ida nee iha dazafiu barak mak enfrenta, iha governasaun balu la too tinan 5, maibe PLP lae, ukun lao too tinan 5.
Maibe buat neebe importante mak ukun ho responsabilidade, neebe votus PLP tun laos tanba servisu la masimu, maibe buat hotu depende ba povu, povu nia desizaun tenki respeita.

Biban nee nia mos hatoo parabens ba CNRT neebe manan maioria, tanba povu mak desidi. Buat neebe importante garante dezenvolvimentu ba povu.

Eleisaun parlamentar neebe liu daudaun, povu partisipa masimu hodi desidi partidu 17, neebe kompete atu ba tur iha PN nomos ba iha governu durante tinan 5.

Rezultadu kontajen daudaun nee tama ona iha 90%, iha Partidu CNRT hetan votus maioria, ida nee desizaun povu.

(gui)

LEAVE A REPLY

Please enter your comment!
Please enter your name here