Xanana-Alkatiri Aban Partisipa Primeiru Reuniaun VI Lejislatura

DILI, STLNEWS.co – Aban (22/06/2023) Prezidente Partidu CNRT, Kay Rala Xanana Gusmao ho Sekretariu Jeral Partidu FRETILIN, Mari Alkatiri partisipa iha primeriu reuniaun ba VI Lejislatura iha Parlamentu Nasional (PN) tuir lista neebe iha.

Kestaun nee haktuir husi Sekretariu Jeral Adjuntu Parlamentu Nasional, Joao Rui Amaral ba jornalista sira iha PN, Kuarta (21/20/2023).

Nia dehan, aban partisipa ba sira neebe la re-eleitu iha V Lejislatura nian, Parlamentu Nasional fo konvite sei mai partisipa hotu.

“Xanana ho Mari, sira 2 nia naran tama hotu kompletu iha meza, too ohin loron ami seidauk simu informasaun ruma dehan sira la mai, nee lae, tanba sira nia palaka iha meza nee mos ami prepara tiha ona,” dehan nia.

Nia esplika, iha konvokatoriu neebe Prezidente Parlamentu Nasional (PPN) hasai nee ba sira neebe mak naran tama iha lista, neebe tribunal notifika nee tama hotu, entaun aban komesa tuku 10.

Nia afirma, Prezidente Parlamentu Nasional mak sei halo abertura hotu, konsekuensia tuir mai sira sei diskuti oituan konaba deliverasaun ba komisaun deverifikasaun dos puderes nian, depois ida nee pauja komisaun sira sei halo sira nia servisu, depois hotu komisaun sei hatama fila fali sira nia relatoriu para tama fila fali ba konsekuensia sira tuir mai, no halo eleisaun ba meza prezidensial.

Nia tenik, preparasaun atu simu deputadu foun nee halo antes tiha ona. Entaun ohin ba preparasaun ida final nian, atu haree kondisoens sira neebe fasilita ba primeriu reuniaun ba aban ninian.

Nia sublina, entaun ohin koloka naran deputadu sira tuir lista neebe mak iha, no tuir fatin sira kada deputadu atu tuur ba, no iha deputadu balun komesa mai haree sira nia fatin hodi hatene atu ba tuur loos iha neebe.

“Fatin neebe koloka ba tuir kada bankada sira, entaun husi parte liman los bankada opozisaun sira nian, no iha parte liman karuk nee bankada governu sira nian,” hakotu nia.

(dom)

LEAVE A REPLY

Please enter your comment!
Please enter your name here