DILI, STLNEWS.co – Xefi Negosiador no Pesoa Eminente g7+, Kay Rala Xanana Gusmão akompaha husi eis Embaixador Roberto Soares halao enkontru ho Embaixador Australia ba Timor-Leste, Bill Costello no Adidu Defeza, Paul Pembroke no Konselheira Bonnie Hoffman.
Enkontru nee rasik halao iha Sekretariadu g7+, Díli, Tersa nee (21/3/2023), Xanana ho hasolok simu vizita nee hodi hametin liu tán lasu kooperasaun.
Embaixador Bill Costello fahe informasaun konaba Governu Australia nia komitmentu hodi hametin no haburas nafatin kooperasaun no relasaun bilateral entre Australia no Timor-Leste. Embaixador mos partilha informasaun konaba kooperasaun trilateral seguransa AUKUS nian entre Australia, EUA i Reino Unido (UK).
Iha tempu hanesan, (11h00-11h50), 21 Marsu 2023, Xefi Negosiador no Pessoa Eminente g7+, Kay Rala Xanana Gusmão mós simu vizita kourtezia husi Embaixador Marc Fiedrich, Xefi Delegasaun Uniaun Europeia nian ba Timor-Leste.
Iha sorumutu nee mos Embaixador União Europeia hatoo nia komitmentu hodi hametin nafatin kooperasaun entre Uniaun Europeia no Timor-Leste. Embaixador mós partilha informasaun konaba Uniaun Europeia nia prontidaun hodi fo apoiu teknika ba eleisaun parlamentares Timor-Leste nian.
Xanana mos partilha esperiensia Timor-Leste nian iha tinan 20 nia laran, konaba prosesu konsolidasaun no konstrusaun nasaun nian.
Xanana mos agradese ba Uniaun Europeia nia apoiu ba Timor-Leste, no sei haree ba oin hodi hametin liu tan kooperasaun entre Timor-Leste ho Uniaun Europeia.
(cri)
