Xanana Informa Partidu Rua Lao Hamutuk Ba PR Horta

DILI, STLNEWS.co – Prezidente Republika (PR) Jose Ramos Horta halo enkontru ho Partidu CNRT, iha biban nee lideransa CNRT mos relata ba Xefi Estadu katak, Partidu CNRT ho PD mak sei lao hamutuk hodi ukun iha IX Governu.

Bainhira remata halo enkontru, Prezidente Partidu CNRT Kay Rala Xanana Gusmao ba jornalista sira iha Palasiu Prezidente Bairo Pite, Kuarta (07/06/2023) hatete, sira mai tanba prezidente mak konvida.

Prezidente Partidu CNRT hatete, Prezidente Republika konvida enkontru informal, tanba CNRT sai partidu vensedor neebe mai husu atu lao nusa, hotu-hotu hatene ona, Sekretariu Jeral Partidu CNRT Francisco Kalbuadi Lay ba tiha ona Sede Partidu Demokratiku no koalia tiha ona, neebe hotu-hotu hatene ona.

“Ami mos informa ba Xefi Estadu, partidu rua nee sei lao hamutuk no ora-oras tan PD sei mai hasoru mos Xefi Estadu, maibe enkontru sira nee sei informal no formal lo-loos nee depois sesaun dahuluk VI Lejislatura. Ami husu hela ba Xefi Estadu konaba kalendariu, no horiseik Prezidente PN Aniceto Guterres koalia ona katak, hein too loron 15, no sei monu iha loron 22 Junhu no ita hein atu liu tiha nee iha loron daruak eleisaun ba Prezidente Parlamentu Nasional foun no tuir mai komisaun sira no buat sira selu-seluk tan,” dehan Xanana.

Nia hatutan, bainhira iha ona membru parlamentu mak Xefi Estadu bele bolu formalmente, Primeiru Ministru indijitadu neebe mai husi partidu maioria parlamentu mak indijita.

Lider Karismatiku hatete, ohin nee Xefi Estadu bolu CNRT hanesan partidu mais votadu, laos Primeiru Ministru indijitadu. Maibe hafoin eleze tiha PPN, Visi Prezidente no komisaun sira hotu foin mak Xefi Estadu bolu Primeiru Ministru indijitadu formalmente hodi husu dehan formasaun governu oinsa atu bele diskuti.

Nunee mos tuir informasaun katak, sesaun lejislatura foun sei akontese iha fulan Setembru mai, maibe CNRT la aseita ho ida nee, maibe tuir previzaun ba rejimentu neebe hatete masimu loron 15 onestamente konkorda ho ida nee.

Hatan ba kestaun nee, Xanana hatete, sira obedese ba regra sira atu labele hamosu difikuldade ba ordem publika neebe iha.

Iha biban nee, Xanana mos parabeniza povu Timor Leste no liu-liu ba juventude sira neebe hatudu maturidade no hahalok diak durante kampanha eleisaun parlamentar lao diak no laiha akontesimentu ruma no halo apelu atu situasaun nee kontinua nunee hodi revela ba maturidade polítika povu ninian.

Iha biban nee, Prezidente Republika Jose Ramos Horta hatete, nia iha konfiansa tomak ba partidu rua, no nia kontenti tebes tanba governasaun nee lidera husi lider Karismatiku Xanana Gusmao, ema neebe mak iha matenek no kapasidade hodi lori rai nee ba oin.

(gui)

LEAVE A REPLY

Please enter your comment!
Please enter your name here