DILI, STLNEWS.co – Primeiru Ministru Kay Rala Xanana Gusmao halo enkontru semanal ho Prezidente Republika Jose Ramos Horta, hodi informa servisu governu nian ba iha Xefi Estadu.
Bainhira remata enkontru, Primeiru Ministru Kay Rala Xanana Gusmao ba jornalista sira iha Palasiu Prezidente Bairo Pite, Kinta (31/08/2023) hatete, enkontru semanal objetivu atu informa ba prezidente saida mak halao ona, no saida mak seidauk halo, no rona mos husi prezidente katak governu halo saida, laos manda, mais rekomendasaun katak halo ida nee no halo ida neeba.
“Ami sei halo hela organika husi ministeriu sira, tanba iha mudansa hotu, nee ami halao iha dia 29 no horiseik feriadu, sei iha tan balun tan lori mai prezidente asina,” dehan PM Xanana.
Iha hasoru malu nee Primeiru Ministru relata mos ba Prezidente Republika konaba problema neebe mak governu enfrenta, no prezidente mos bolu atensaun ba iha IP sira barak liga ou institutu publiku, katak ho salariu boot, maibe la halo buat ida.
“Hau mos informa katak, ami diskuti ona IP sira nee, kuandu iha ministeriu ida iha balun ami taka daudaun ona. Tanba ita laos kria estadu boot mais ita kria estadu ida neebe bele servi povu haree uluk saida mak ita halo, laos ita prepara populasaun tomak mai governu deit, ida nee mak hau dehan hela, no buat barak,” katak Xanana.
Nia hatutan, iha dia 30 Agostu partisipa misa. Ida nee fo lembra ba governu katak, iha lejislatura foun nee hetan ukun aan nomos sakrifisiu povu nia. Sira nia mehi atu moris diak, nee mak governu no parlamentu tenki tau iha isin, hanoin no fuan, servisu oinsa hodi bele hadia povu nia moris iha tinan 5 nia laran.
Loron 120 IX Governu lao neineik, no prezidente mos husu atu halo auditoriu.
“Hau dehan lae, agora premeiru ami buka rekolha dadus neebe mak ami haree katak, instutuisaun sira neebe kaer justisa haree konaba lei iha tinan hirak nee lahalo buat ida, ho sentidu katak lafo apoiu ba komprimentu lei, tanba buat barak halo viola normas lei,” nia tenik.
Primeiru Ministru hatete, laos deit atu lori ema ba kadeia maibe hakarak deit fo hatene ba povu tomak katak, sira sei hasai no divulga buat sira nee hotu ba povu tomak, hodi iha futuru semak ba kaer governu, se mak kaer ukun labele halo hanesan nee tan, selae estadu la serve.
Ho difikuldade sira nee mak sei planu asaun annual ba tinan mai, no prepara orsamentu hodi lori mai iha PN no sei halo mos alterasaun lei tributaria no alterasaun ba Lei Enkuadramentu Orsamental, no buat sira neebe mak temi ona iha proposta lei, no lei orsamentu ezekutivu nia sei hatama deskute fali iha parlamentu, antes de hatama orsamentu iha neeba.
Aleinde nee PM Xanana informa mos katak, Prezidente Jokowi haruka konvite ba nia, atu partisipa iha ASEAN Samets fulan 3, katak durante fulan 3 PM laiha Timor, maibe sei iha ASEAN.
PM hatutan, nia partisipa iha ASEAN nuudar Xefi Governu sei hasoru ho lider boot husi nasaun seluk, para rona no aprende, tanba TL seidauk full membru, tanba nee sei lakoalia `maibe ba rona no aprende, karik prepara aan 2025 sai full membru ona.
Iha biban nee, Prezidente Republika Jose Ramos Horta husu ba Primeiru Ministru Kay Rala Xanana Gusmao atu kontinua halao nafatin servisu ba oin ho diak, hodi servi povu no lori rai nee ba oin.
Aleinde nee, Prezidente Republika mos komprende dezafiu neebe mak Primeiru Ministru Kay Rala Xanana Gusmao hatoo ona ba nia, maibe husu halao servisu ba oin nafatin.
(eme)
