DILI, STLNEWS.co – Primeiru Ministru (PM) Kay Rala Xanana Gusmao senti kontenti ba vizita husi Primeiru Ministru Portugal Antonio Costa, nomos ministru lubuk ida neebe vizita Timor Leste (TL) hodi fo konfiansa ba governu atu hadia regra iha TL.
Primeiru Ministru Kay Rala Xanana Gusmao hatoo lia hirak nee ba jornalista sira, bainhira remata hasoru malu ho Prezidente Republika Jose Ramos iha Palasiu Prezidente Bairo Pite, Kinta (27/07/2023).
“Ohin ami koalia mos Primeiru Ministru Portugal nia vizita, hau senti kontenti, katak buat ida katak lalais, tanba preokupa ho organika neebe ita simu nee lalais, mais ita hotu kontente, liu-liu primeiru vez mos, depois simu pose simu Xefi Governu ida primeiru vez, mais simu mos Ministeriu Negosiu Estranjeiru husi Xina, Japaun, Singapura no Australia, hodi hatudu mos mai ita sira nia konfiansa katak, ita atu hadia ita nia rai nee para sai fali rai ida neebe fo ezemplu ba regra ba demokrasia no regra liu liu konaba tranparansia, konaba honestidade, responsablidade husi ema hotu neebe povu hili atu kaer ukun,” dehan Xanana.
PM hatete, vizita sira nee tanba fo konfiansa ba governu atu hadia Timor Leste sai fali rai neebe sai ezemplu ba demokrasia no hakruuk mos ba regra liu-liu konaba transparansia no honestidade konaba responsablidade husi ema hotu neebe povu hili atu kaer ukun.
Nia hatutan, sira mai laos atu lao pasiar, maibe atu fo konfiansa, signifika konfiansa nee ba governu ho responsablidade.
“Se mak dehan sim hili ona, ami iha ona kotuk sei dudu ita, halo nusa para lori rai nee ba oin no povu ida nee ba moris diak,” katak nia.
Nunee mos bainhira mak haruka naran Komisariu KAK ba iha Parlamentu Nasional, hatan ba kestaun nee, PM hatete, oras nee sei ilegal hela, bainhira promulga ona lei organika mak sei haree ba ida nee.
(eme)
