DILI, STLNEWS.co – Primeiru Ministru Kay Rala Xanana Gusmão fo orientasaun ba Ministeriu Obras Publika (MOP), Ministeriu Planeamentu Investimentu Estrateziku (MPIE) no Ministeriu Saude (MS), atu halo reabilitasaun urjensia rezidensia ba doutor no mediku Kubanu bele hela iha Bidau Toko Baru, Dili.
Orientasaun nee Xefi Governu fo, hafoin hamutuk ho Ministru Obras Publika, Samuel Marçal, Ministra Saude Elia Reis Amaral no Ministru Planeamentu Investimentu Estrateziku, Gastão Francisco de Sousa halao vizita no observasaun direita kondisaun fiziku rezidensia komesa aat.
“Ita presiza hadia urjensia, para fasilita doutor sira bele hela ho diak,” dehan PM Xanana iha Bidau, Sesta nee (01/09/2023).
Hafoin halo obserbasaun, Ministru Obras Publiku Samuel Marçal koordena kedas ho Ministra Saude no Ministru Gastão hodi halo preparasaun reabilita iha semana nee.
Rezidensia neebe halo komesa tempu Indonezia nian, kompostu husi uma boot 3 no coby house 2. Daudaun nee kondisaun fiziku komesa aat, hanesan uma kakuluk kalen komesa kuak no plafon dodok hotu ona, inklui moru protesaun neebe halo haleu uma komesa naksobu.
(alb)
