DILI, STLNEWS.co – Ohin Primeiru Ministru Indizitadu ho ekipa hasoru malu ho Prezidente Republika Jose Ramos Horta hodi troka opinaun ba malu, antes simu tomada de pose.
Lia hirak nee hatoo husi Lider Karismatiku Kay Rala Xanana Gusmao hanesan mos Prezidente Partidu CNRT ba jornalista iha Palasiu Prezidente Bairo Pite, Kinta (29/06/2023).
Nia hatete, Partidu CNRT no PD iha komprimisiu atu serbi laos buka kargu, tanba nee ohin mai troka opinaun ho PR Horta antes simu pose.
“Ohin Prezidente Republika bolu Primeiru Ministru indizitadu hanesan mos imi hotu hatene ona loron hirak nee ami sai PD tama katak, iha kooperasaun diak intendimentu diak ho PD hodi halo aliansa ida koligasaun ba IX Governu, nee mak ohin ami mai. Primeira vez ho partidu rua iha IX Governu hodi hatoo buat ruma no prezidente mos fo hanoin ruma katak, labele haluha neeba, haluha ida nee, ami troka hanoin ba malu,” dehan Xanana.
Prezidente Partidu CNRT hatete, bainhira membru governu simu ona pose, sei enkontru nafatin ho Prezidente Republika hodi troka hanoin ba malu.
Xanana dehan, kriteria neebe mak sira lori atu hili membru governu, premeiru nesesidade atu halo saida, segundu iha esperensia ruma, terseiru mak ema neebe iha esperensia fo tiha servisu halo.
“Ami iha kompromisu atu serbi laos atu ba sai ministru ka sai ida nee ka ida neeba la hatene servisu ema seluk tenki tama, tanba prinsipiu partidu rua nia ba governu mak nee, ba atu serbi, nee duni kriteria mak nee ba haree tuir saida mak presiza atu halo, segundu ema sira neebe ita tau iha neeba bele halo buat ruma,” katak nia.
Partidu rua kaer governu presiza halo mudansa, no presiza ekipa neebe mak forte atu bele lori IX Governu ba oin hodi halo dezenvolvimentu neebe mak sustentavel, mai atu serbi laos buka okupa posizaun.
Nunee mos total membru governu nain hira mak sei simu pose, hatan ba kestaun nee, Xanana hatete, seidauk hatene los, depois pose mak hatene. Nunee mos se mak sei asumi Primeiru Ministru, Xanana hatete, hein deit sei publika iha jornal republika, no bainhira simu tomada de pose mak sei hatene.
Iha biban nee, Prezidente Republika Jose Ramos Horta husu membru governu atu servisu ho responsabilidade.
PR hatete, presiza servisu ho diak, servisu ho responsabilidade, se la hatene sai, no presiza kordena no koopera didiak ho partidu, koopera didiak ho parlamentu, sosiedade sivil, no parte hotu hodi haree saida mak presiza halo, no la halo tanba saida no karik halo sala dala rua dala tolu sai husi membru governu.
(eme/don)
