DILI, STLNEWS.co – Xefi Ezekutivu Kay Rala Xanana Gusmão ho Ministra Negosiu Estranjeirus no Kooperasaun (MNEK), Australia Penny Wong hasoru malu, kontinua hametin relasaun amizade bilateral, no sei kontinua apoia dezenvolvimentu iha IX Governu.
Primeiru Ministru Kay Rala Xanana Gusmão dehan, sira hasoru malu dala barak ona, i Ministra Negosiu Estranjeirus Australia nee amiga diak ho Timor-Leste.
“Ministra mai hatudu lo-loos amizade, solidariedade, domin ba Timor-Leste, tanba nee hein programa IX Governu aprova iha parlamentu sira sei haree no apoia TL”, katak Xefi Ezekutivu Xanana Gusmão ba jornalista sira, hafoin remata hasoru malu iha Palasiu Governu, Sesta (07/07/2023).
Xanana hatete, iha hasoru malu nee, sira koalia anivel por alto deit, tanba daudaun nee governu sei diskuti hela programa, i seidauk aprova.
Depois aprova iha Konselhu Ministru (KM) lori ba Parlamentu Nasional (PN) aprova tiha mak sei haree, setores ida neebe mak Australia atu apoia ba dezenvolvimentu iha TL.
Entretantu, Ministra Negosiu Estranjeirus no Kooperasaun Australia, Penny Wong hatete, iha hasoru malu ho PM, nia parte labele koalia buat barak, tanba sei iha diskursu ida neebe mak sei koalia.
Maibe servisu mai Timor-Leste hodi kongratula Kay Rala Xanana nudar Primeiru Ministru IX Governu Konstutusionál, kontinua hametin kooperasaun.
“Primeiru Ministru Xanana ema neebe diak no sempre koalia ba interese Timor-Leste, i hau hatoo ba PM vontade husi Australia hodi hamutuk ho governu foun realiza futuru Timor-Leste, no Australia prontu apoia ekonomia no dezenvolvimentu,” informa Ministra Penny.
Nia hatete, Australia dezde uluk sai belun diak ba Timor-Leste no iha kompromisu no domin boot atu servisu hamutuk ho Governu Timor-Leste, hodi kontinua apoia dezenvolvimentu ekonomia.
Observasaun STL haree, depois remata enkontru, Ministra Penny Wong entrega premiu Xapeu ida neebe simbolu tais haleu iha klaran.
Nunee mos Xefi Governu Xanana Gusmão entrega tais Timor ba Ministra Penny Wong, neebe suku ba Dress, Simbolu Roo, Kafe Timor, selendang hakerek Penny Wong, inklui Bandeira TL ho Bandeira Australia.
(gui)
