DILI, STLNEWS.co – Primeiru Ministru Kay Rala Xanana Gusmao hatete, Polisia Sientifika Investigasaun Kriminal (PSIK) tenki iha mudansa mentalidade iha atuasaun, laos naran ba kaer ema arbiru.
Primeiru Ministru Kay Rala Xanana Gusmao hatoo lia hirak nee ba jornalista sira bainhira remata hasoru malu ho Prezidente Republika Jose Ramos Horta iha Palasiu Prezidente Bairo Pite, Kinta (03/08/2023).
“Tenki iha mudansa mentalidade, tenki iha mudansa atuasaun, PSIK forma nee ho kbiit ba saida, tanba nee mak ita dehan polisia sientifika, se polisia sientifika laos katak kaer ema naok hudi nia ba naok,” dehan PM Kay Rala Xanana Gusmao.
Nia hatete, governu sei buka hodi hadia servisu PSIK nia, atu nunee halao knaar nudar polisia sientifika de investigasaun uza siensia hodi investiga ou kaptura laos kaer ema arbiru, tanba nee bainhira governu hadia ona mak sei fo hatene katak, PSIk nia misaun los mak ida nee.
Foin lalais Prezidente Republika Jose Ramos Horta vizita PSIK, no fo parabens ba servisu PSIK neebe hahu tempu kleur ona.
Iha vizita nee Prezidente hatete, governu anterior halo investimentu diak ba PSIK konsege halo forenshik, investigasaun konaba nota falsu, dokumentu falsu nee tuir teknolojia modernu, atu halo re-estrutura ba PSIK nee kompetensia governu nian, halo re-estrutura ka re-organizasaun nee sempre kualker organizasaun bele halo, atu moderniza sai forsa liu tan, bele preparadu liu tan, halo servisu ho kompetensia ho integridade ho imparsialidade.
Xefi Estadu hatete, hotu-hotu buka adia organizasaun, buka halo reforma, atu bele resposta diak liu ba realidade ameasa neebe iha epoka ruma presiza, hanoin atu halo re-estruturasaun, re-organizasaun tanba sa mak labele, nee normal.
(eme)
