LOSPALOS, STLNEWS.co – Eis Prezidente Timor GAP, Francisco Monteiro hatete, fronteira maritima maun boot Kay Rala Xanana Gusmão rezolve tinan 1 ho balun deit, sira neebe dehan maun boot Xanana bosok, sira la hatene prosesu no sira sei dukur hela.
“Fronteira maritima ita nia maun boot negosia ho difisil tebes-tebes, mais ita hetan tiha ona ita nia fronteira, tasi ida ke luan tebes-tebes, iha parte ida iha mundu nasaun balun negosia ho tinan 40 ka 50 mak foin hetan rezultadu, mais iha Timor ita negosia iha tinan 1 ho balun nia laran deit. Ema sira neebe dehan Xanana bosok nee, sira la hatene prosesu nee, ka dukur hela karik, aleinde iha ema balun mos dehan sira hakarak dada kadoras mai Timor, maibe iha sira nia tempu tinan barak sira husik tiha kadoras Bayu Undan ba Australia,” dehan Fracisco Monteiro ba militante sira bainhira partisipa iha komisiu eleitoral ba da haat CNRT iha kampu futebol Lautem, eis asrama 745 Lospalos, Tersa nee (25/04/2023).
Nia katak, prosesu negosiasaun tomak ba fronteira tasi nee lidera rasik husi maun boot Kay Rala Xanana Gusmão too hetan nia rezultadu no Timor bele defini ninia fronteira tasi ho Australia.
“Iha tinan barak nia laran, iha CNRT nia ukun ita halo esforsu hotu-hotu atu dada kadoras mai Timor Leste, maibe iha parlamentu sira rasik mak vota kontra tiha, ida nee ita konsidera sira laiha interese nasional hodi dada kadoras mai Timor Leste,” katak nia.
Nia afirma, CNRT nia objetivu hakarak dada kadoras mai Timor Leste, bele kria industria barak-barak, kria kampu trabalhu, kria atividade ekonomia hodi dezenvolve rai ida nee.
“Tan nee, CNRT ho lideransa maun boot ho nia aliadu sira, husi partidu sira neebe mak apoiu CNRT iha periodu ida nee, ita fiar katak lori maun boot Kay Rala Xanana Gusmão ba Primeiru Ministru,” afirma nia.
Iha biban nee, eis Prezidente Timor GAP nee husu ba militante no simpatizantes Partidu CNRT, se hakarak lori maun boot Kay Rala Xanana Gusmão ba Primeiru Ministru vota ba CNRT.
“Se imi hakarak lori maun boot Kay Rala Xanana Gusmão ba Primeiru Ministru, 21 Maiu vota ba CNRT, vota ba numeru 12, nunee maun boot ba kaer ukun bele lori kadoras mai Timor Leste. Lori kadoras mai Timor, ita bele dehan nee hanesan salvasaun ekonomia ba ita nia nasaun,” nia akresenta.
Daudaun nee partidu sira neebe kaer ukun hatene mak hasai osan, sira mos laiha hanoin oinsa mak bele hatama osan.
“Partidu neebe kaer ukun daudaun nee hatene mak hasai osan, maibe seidauk halo buat ida atu asegura kadoras mai Timor Leste hodi hatama fila fali osan ba fundu petrolifeiru. Fundu petrolifeiru agora hela deit US$ 17 bilhoens,” nia Sublina.
Nia afirma, bainhira iha tinan 8 nia laran mak laiha dezenvolvimentu seluk, nasaun Timor Leste ninia finanseiru sei bankrota.
“Tan nee, CNRT ho maun boot nia lideransa hakarak halo salvasaun nasional ida ba ekonomia ida neebe buras liu tan, liu husi dada kadoras mai Timor Leste,” tenik nia.
(cri)
