Xanana: TL-RI Kontinua Diskuti Fronteira Terestre

DILI, STLNEWS.co – Delegasaun husi Republika Indonezia (RI) ho Timor Leste (TL) diskuti konaba segmentu noel besi citrana iha fronteira terestre Oekusi, neebe sei salva guarda soberania nasional rai rua nian.

Kestaun nee hatoo husi Primeiru Ministru Kay Rala Xanana Gusmao ba jornalista sira, bainhira remata hasoru malu ho Prezidente Republika Jose Ramos Horta iha Palasiu Prezidente Bairo Pite, Kinta (30/11/2023).

Nia hatete, ohin mai informa ba iha Prezidente Republika katak, oras nee daudaun delegasaun husi Indonezia ho Timor Leste kontinua halo diskusaun ba iha fronteira terestre.

“Asuntu prinsipal liu mak enkontru ho ekipa Indonezia neebe sei iha nee, no ohin sei kontinua enkontru konaba fronteira terestre, atu finaliza tiha fronteira terrestre,” dehan PM Xanana.

Primeiru Ministru hatete, emprinsipiu bele dehan enkontru lao diak, depois mak sei haree took, no ohin informa ona ba Xefe Estadu katak, enkontru sira nee lao diak, no bainhira mak asina tratadu no atu oin nusa sira nee ikus ona, tanba ekipa ida Indonezia nian sei fila fali ba Governu Indonezia informa ba governador, mas dezde loron 20 too 27 fulan Novembru ekipa sira iha Oekusi hodi sukat, marka, nee duni servisu nee bele dehan hotu tiha ona.

Xefe Governu hatete, Timor Leste fiar katak delimitasaun definitiva no permanente fronteira ho Indonezia sei salva guarda soberania nasional, hametin tan seguransa, garante defininasaun sosiu kultural, no sei lori benefísiu sosiu ekonomiku ba nasaun rua.

Iha biban nee, Primeiru Ministru hatutan, Prezidente Republika José Ramos Horta mak sei reprezenta Timor Leste iha forum mundial ba alterasaun klimatika (COP28) no Timor Leste hanesan membru kiik liu iha mundu, neebe mos sofre ba alterasaun klimatika laos tanba kauza Timor Leste nian, maibe Timor Leste sofre alterasaun klimatika nuudar konsikuensia husi nasaun boot no avansadu sira neebe estraga planeta.

Iha Outubru liu ba ekipa Timor Leste nian ba iha Tribunal internasional iha Alemanha hodi deklara kona-ba situasaun sira iha Timor Leste no Tribunal internasional foin halo konsulta kona-ba mudansa klimatika, kona-ba utilizasaun energia focio no Timor Leste tuir lei internasional kada país iha direitu ba esplorasaun ba nia rekursu rasik ho kompromisiu atu labele estraga ambiente no PM Xanana iha esperansa katak Xefe Estadu iha Dubai sei koalia mos konaba ida nee, no sei mensiona mos konaba biodiversidade neebe antes nee iha Lisboa PM Xanana koalia ona konaba tasi moos.

Xanana hatutan, Timor Leste hanesan nasaun kiik ida neebe riku ho biodiversidade diak liu iha mundu. Kada nasaun ida tenke iha kompromisiu atu proteze 30% area marítima no Timor Leste hein katak Xefe Estadu sei koalia iha forum COP28 nee kona-ba Timor Leste nia protesaun ba tasi sira parte norte sei laiha produsaun ba energia focio no iha tasi sira iha parte norte sei sai hanesan fatin protezidu ba biodiversidade.

(eme)

LEAVE A REPLY

Please enter your comment!
Please enter your name here