DILI, STLNEWS.co – Primeiru Ministru (PM), Taur Matan Ruak, tristi ho hahalok joven Timor oan neebé hatudu jagoan iha rai liur.
“Hau tristi loos, tanba uluk Timor oan luta ba ukun aan, iha fatin-fatin jagoan loos foti bandeira Timor, maibe ukun aan tiha balun iha malae nia rai hatun fali bandeira RDTL, nee ladun diak no fo imajen la diak. Nee hatudu katak ita Timor nee so hatene mak halo problema, ida nee labele,” dehan Primeiru Ministru, Taur Matan Ruak, ba jornalista sira bainhira remata enkontru semanal ho Prezidente Republika, Jose Ramos Horta, iha Palasiu Prezidensial Nicolau Lobato, Bairu Pite, Dili, Kinta nee (28/07/2022).
Nia hatutan, hanesan aman, maun no Xefi Governu, nia husu ba sidadaun sira hotu atu hatudu komportamentu diak.
“Ita nasaun ida, ita nia komportamentu nee tenki sivilizadu oituan, tanba buat neebe ita halo iha fatin seluk nee ita nia naran dois hotu. Hanesan ita boot sira hatene sira neebe kaben nain, bainhira oan sira halimar estraga ema nia sasan no halo aat ema nia buat ruma iha jardin, ema trata too inan aman, katak inan aman la hanorin, maibe lo-loos nee inan aman la sala buat ida, ida nee mos hanesan sira halo iha ema nia rai, ita iha Timor mak lori todan,” informa PM Taur.
(cri)
