2021 Laiha Atraza Kompras Medikamentu

Ministra Saude (MS), Odete Maria Freitas Belo. (Foto: Media Palácio das Cinzas)

DILI, STLNEWS.co — Ministra Saude (MS), Odete Maria Freitas Belo, promete tinan 2021 sei laiha atraza hodi kompras medikamentu ba iha Servisu Autonomu Medikamentu Ekipamentu Saude (SAMES) no garante stock ai-moruk durante tinan tomak.

Nia hatete, tinan 2020 governu utiliza deit Dotasaun Orsamentu Temporariu (DOT), hodi kompras ai-moruk uitoan, uitoan no kompras ai-moruk tuir nia tempu, momentu nee saida mak akontese ba iha SAMES krize COVID19, buat hotu atraza no konsente katak, SAMES mos ai-moruk laiha .

Governante esplika, iha 2020 governu lao ho orsamentu duodesimu, momentu nee MS la aplika ba iha SAMES hodi sosa ai-moruk, no konsege akontese stock out, maibe iha fulan primeiru MS sosa uitoan, uitoan no tenta ba koalia ho Ministeriu Finansas sira apoiu hodi sosa netik ai-moruk nunee garante ba iha stock iha armazein.

“Hau hanoin ba tinan 2021 rai mak atu funu ka tasi mak atu sae mos, ita sei sosa ai-moruk no sei la atraza tan, ita tenke iha desizaun neebe lais para bele halo kompras,” dehan MS Odete ba jornalista, iha salaun Caicoli, Dili, Tersa (15/12)2020).

Governante nee dehan, koalia kona ba jestaun ai-moruk iha armazen SAMES lao diak, maibe iha neebe deit ai-moruk neebe expire nee iha, maibe ninia expire mak labele barak liu.

“Ai-moruk ita sempre sosa ho ninia expire mos iha no nia soe mos iha, maibe ninia kuantidade mak tenke redus,” nia informa.

Tanba tuir nia katak, laiha nasaun ida mak la soe ai-moruk, iha maibe tenke tau jestaun neebe diak hodi redus kuantidade soe ai-moruk .

“Tinan-tinan orsamentu ba SAMES sempre iha, governu sempre aloka, soke tinan nee ita hasoru situasaun duodesimal nee mak halo atrazu ita kompras ai-moruk, maibe governu nunka atu haluhan atu sosa ai-moruk,” nia afirma.*

Reportajen: Jeniche da Costa
Editora: Carme Ximenes

LEAVE A REPLY

Please enter your comment!
Please enter your name here