DILI, STLNEWS.co – Tinan 2023 nee Servisu Autonomo Medikamentu no Ekipamentu Saude (SAMES) halo ona akizasaun, no kompanhia neebe mak hetan ona tenderizasaun hamutuk 23.
“Prosesu akizasaun ba produtu medikamentus tinan ida nee ita lao hotu ona, i balun tama ona iha tenderizasaun, neebe kompanhia hamutuk 23, kompanhia sira nee balun asina ona kontratu no balun sei halo konfirmasaun ba presu, tanba mudansa ba kuantidade, entaun nia presu mos implika, kompanhia neebe mak SAMES halo kontratu hamutuk 23 ho valor neebe mak lahanesan,” Lia hirak nee hatoo husi Diretor Aprovizionamentu iha SAMES, Nelson Correia ba jornalista iha edifisiu SAMES, Tersa nee (02/05/2023).
Nia dehan, liu- liu ba produtu aimoruk vital nee SAMES halo kontratu ho kompanhia tolu, ba aimoruk nesesariu nee mos halo kontratu ho kompanhia haat, aimoruk esensial halo kontratu ho kompanhia tolu, depois aimoruk espesial mos iha kontratu ho kompanhia tolu, nomos produtu ba iha fase raan nian nee mos halo kontratu ho kompanhia ida, ba oksijeniu mos kontratu ho kompanhia ida, ikus liu ba konsumeveis sira nee ba halo kontratu ho kompanhia ida no produtu seluk tan.
Nia haktuir, kompanhia sira neebe mak manan tenderizasaun nee husi nasional no internasional, iha Indonezia, Timor, Polandia, Australia, Singapura no India.
Nia afirma, kompanhia sira nee normalmente fo kontratu nee iha loron 60 nia laran too iha 90 nia laran, maibe depende ba prosesu deliberasaun no situasaun natureza mundu nia.
Loron 5 fulan Maiu nee fabrika husi Indonezia sei haruka tan ekipamentus sira hanesan soru talin ho suru ben mai iha TL.
“Tanba ita nia stok rua nee menus ona, maibe soru talin nee stok laiha ona, neebe stok sira nee menus ona,” tenik nia.
Nia akresenta, neebe prosesu ba kontrolu produtu sira nee menus ona, entaun diretamente hatoo kedas ba iha kompanhia sira neebe mak hetan ona tender para sira bele responde kedas.
Orsamentu neebe mak aloka mai iha SAMES nee total US$ 5.2 milhoens, nee la sufisiente.
Diretor Armajenamentu Distribuisaun SAMES, Octavio Fernandes informa, akizasaun ba tinan 2023 nee hahu ona.
“Neebe orsamentu neebe mak aloka mai iha SAMES tinan 2023 nee iha orsamentu US$ 5.2 milhoens, maibe prosesu nee agora ita lao hotu ona,” dehan nia.
Nia dehan, neebe kontratu sira nee mos hahu ona, kompanhia sira asina ona, neebe hein deit kompanhia sira neebe mak manan tender nee halo distribuisaun ka halo importasaun aimoruk nee mai Timor.
Diretor Nasional Farmasia no Medikamentu iha Ministeriu Saude, Delfim Fereirra akresenta, maibe item ida rua neebe mak iha nee sira distribui depois mak halo pagamentu, ida nee mak esforsu husi DNFM.
“Kompras adisional neebe mak halo husi prosesu aprozionamentu SAMES nian, ita foti orsamentu husi fundu Covid-19,” haktuir nia.
(nat)
