DILI, STLNEWS.co – Dadus pasiente moras mental durante Abril, Maiu no Junhu, neebe baixa iha internamentu Hospital Nasional Guido Valadares (HNGV) nee iha 75 pasiente.
“Dadus husi Abril too Junhu tinan ida nee, total pasiente neebe baixa iha internamentu acute care, departamentu psikiatria ninian hamutuk 75,” lia hirak nee hatoo husi Xefi Departamentu Psikiatria HNGV, Boaventura Jose da Costa ba jornalista iha HNGV, Segunda nee (28/08/2023).
Nia dehan, depois sira neebe mak ba halo konsulta ambulantoriu husi fulan tolu ninian 380 pasiente.
Nia dehan, pasiente sira mai internamentu nee, mai husi hospital referal nomos husi munisipiu sira hanesan Baukau, Vikeke, Lospalos, Aileu no Ermera iklui mos Oekusi.
Kazu tenta oho aan nee idade maoria joven, problema barak mak akontese husi kazu sira nee, tanba kauza familia, kauza ekonomiku.
Aleinde nee Psikolojista Klinika Departamentu Psikiatria Idalina Borges informa, kada loron nafatin rejistu moras mental.
“Tuir hau nia haree kada loron nafatin rejistu pasiente moras mental, no doutor sira kontinua halo tratamentu ba sira, no pasiente sira nee maioria ho ema idade joven,“ dehan nia.
Pasiente moras mental neebe agora daudaun halo tramentu iha HNGV ho idade 20 ba leten mak barak liu.
(nat)
