DILI, STLNEWS.co – Durante fulan Agostu nee Hospital Nasional Guido Valadares (HNGV) liu husi Departamentu Emerjensia simu pasiente hamutuk 5.360.
Kestaun nee hatoo husi Xefi Departamentu Emerjensia HNGV, Eldegar Lopes Martins informa, husi fulan Agostu total pasiente neebe tama iha emerjensia hamutuk 5.360.
“Husi numeru nee ita fahe ba triajen, fahe ba kategoria 1,2, no 3. Iha kategoria 1 nee, sira merese duni mai iha HNGV nain 1.342, ba sira neebe kategoria kinur iha 2.312. Sira neebe kategoria matak 1.706, hamutuk 5.360 pasiente,” dehan nia ba jornalista iha HNGV, Kuarta (06/09/2023).
Nia haktuir, husi numeru nee sira neebe ho asidente trafiku ho motor 242 pasiente, asidente kareta 44. Depois ba sira neebe mak problema ho violensia domestika ho pankada nain 11. Kazu ema sona nain 1, depois violensia fizika sosial nee ema lao iha dalan mak tuda malu, nee iha nain 10, pankada 30, kazu taa ho katana nain 3.
Nia mos haktuir, ba sira neebe mak hakarak koko oho aan iha fulan agustu nee iha nain 3, ba sira neebe mak hemu baygon nee iha nain 2, ema lanu nain 1, depois diretamente hemu baigon nee nain 1.
“Husi total kazu neebe mak ita relata nee total baixa liu husi departamentu emerjensia, baixa iha maternidade nee iha nain 631 pasiente, baixa iha medicina interna nee nain 405, depois baixa ba iha sirujia nain 171, depois baixa ba iha pediatria 182 pasiente, baixa ba iha acute care nee nain 1,” haktuir nia.
Nia afirma, kazu sira neebe mak ho kategoria rua nee, total halo observasaun iha emerjensia 1.955 nee sira observa iha nee, no pasiente sira neebe mak mai halo konsulta tiha fila ba uma nain 2.747 pasiente, tuir lolos nee sira labele mai iha emerjensia, tuir lolos nee sira bele ba iha postu saude ho sentru saude sira, no ba pasiente sira neebe mak husu alta pedidu nee nain 30.
Alende nee Diretor Klinika HNGV, Marcelino Correia informa, HNGV nee pasiente barak mai halo tratamentu iha HNGV.
Nia afirma, kada loron no kada fulan, hospital nee liu husi departamentu emerjensia simu pasiente barak, mak mai halo tratamentu iha nee.
(nat)
