DILI, STLNEWS.co – Iha semana kotuk aimoruk item 42 mak tama ona iha armajen Servisu Autonomu Medikamentu no Ekipamentu Saude (SAMES), bele rekupera hikas stok out sira neebe mak agora daudaun fasilidade saude sira enfrenta hela.
Diretor Armajenmentu no Distribuisaun SAMES, Octavio Fernandes informa, liga ho stok aimoruk, konsumaves no reajentes, inklui aimoruk fase raan sira neebe mak agora dadauk iha SAMES.
“Foin dadauk iha semana kotuk ita mos iha ona aimoruk balun husi kompania balun, neebe mak sai fornesedor iha tinan ida nee, hatama ona aimoruk esensial no vital balun neebe mak agora tama ona iha armajen, ita hein katak, aimoruk sira neebe mak tama nee iha 42 item nee bele rekupera ona stok out sira neebe mak iha, neebe hein loron ida ka rua tan bele halo ona fornesimentu ba iha fasilidade saude sira,” dehan nia ba jornalista iha SAMES Kampo Alor, Tersa (26/09/2023).
Iha fatin hanesan Diretur Interinu Aprovizionamentu Rafael Ximenes haktuir, foin dadauk nee aimoruk barak stok out, depois parte aprovizionamentu nia halo ona prosesu akizasaun tuir kategoria aimoruk nian hanesan, aimoruk vital, esensial no nesesariu.
“Neebe aimoruk foin dadauk tama nee iha vital iha 27 item, esensial iha 16 item depois aimoruk nesesariu nee kompania tolu mak hatama mai, neebe nesesariu nee iha 24 item. Neebe aimoruk sira neebe mak disponivel nee iha vital, esensial no nesesariu,” tenik nia.
Nia hatutan, depois aimoruk hemodialis mos agora tama ona iha armajen, ho tan konsumaves ba matan nian mos tama hotu ona iha armajen SAMES, neebe stok disponivel hela, depois kompania seluk sei hatama tan ekipamentu seluk tan.
(nat)
