DILI, STLNEWS.co – Oras nee daudaun Aimoruk item barak iha Hospital Nasional Guido Valadares laiha, ida nee sai preokupasaun ba pasiente sira neebe baixa iha hospital refere, tanba nee husu ba IX Governu tenki rezolve lalais.
“Ita husu ba IX Governu tenki rezolve lalais problema aimoruk, tanba item barak mak laiha iha HNGV, ami preokupa tebes ho situasaun hirak nee, aimoruk laiha nee fo impaktu ba ema nia vida,” hatete Pasiente Olderico de Jesus ba STL iha sala bedah Laki HNGV, Dili, Sesta (07/07/2023).
Nia dehan, HNGV nudar uniku hospital neebe fo atendimentu kuidadu saude tersiariu, maibe durante halo konsulta, dala barak sira hasai osan rasik sosa aimoruk iha farmasia privadu sira, tanba aimoruk laiha.
“Ita haree aimoruk neebe stok laiha, sira sosa mak hanesan aimoruk insulin injeksaun ba moras diabetes, aimoruk simvastatin kolesterol nian, aimoruk vitamina B1, B6,” nia esplika.
Nia informa, povu hakarak mai konsulta iha hospital, maibe aimoruk laiha, sira mai husi munisipiu tan, laiha servisu, osan iha neebe mak sosa aimoruk sira nee iha apotek, hafoin halo konsulta iha HNGV.
“Hau sofre moras diabetes, neebe tenke sona aimoruk insulin regular, entau hakarak lakohi tenke buka osan atu bele soa aimoruk sira nee, tanba la sona problema boot,aimoruk sira nee balun folin karun hanesan simvastatin nee US$ 4 strip ida,” nia informa.
Iha oportunidade nee, nia husu IX Governu neebe ukun ona tenki tau matan ba povu nia difikuldade, liu-liu asegura servisu prestasaun kuidadu saude lao ho diak no kualidade, atu povu bele hetan saude diak.
(jen)
