Aimoruk Items 154 Laiha

Pasiente moras ba halo tratamentu presiza aimoruk, maibe agora dadaun stock out ba aimoruk ho items hamutuk 154 laiha. (Foto: Espesial)

DILI, STLNEWS.co – Pasiente moras ba halo tratamentu presiza aimoruk, maibe agora dadaun stock out ba aimoruk ho items hamutuk 154 laiha.

Deputada Bankada CNRT, Maria Barreto konsidera, situasaun ida nee seriu tanba metade items aimoruk neebe iha lista medikamentu neebe presiza mak laiha.

“Ita hasoru dezafiu no problema boot mak agora dadaun ita iha stock out, ba ai-moruk neebe mak ho items hamutuk 154, inklui aimoruk sira esensial neebe prioridade ba pasiente no ita hotu iha Timor-Leste,” hatete Deputada Maria ba Jornalista sira, iha PN, Dili, Tersa (19/01/2021).

Nia esplika, iha tinan kotuk 2020, liu husi fundu COVID-19 governu asina akordu ho UNDP hodi sosa medikamentu no ekipamentu sira, maibe realidade metade items medikamentu laiha iha armajen nasional.

Antes nee mos, Deputada Luisa Taeki hatete, iha Hospital Nasional Guido Valdares (HNGV) kuaze 36% husi 154 items aimoruk laiha tanba nee husu governu tenke hare ida nee ho urgente.

“Aimoruk esensial iha hospital nee perigu tebes tanba ai-moruk lorloron tenke fo ba pasiente sira, bainhira ita hatene katak kazu sae makas stock out ai-moruk mos sae makas oinsa, ita nia preokupasaun liga ho COVID-19,” nia esplika.

Nia informa, tuir rezultadu feskalizasaun komisaun F asuntu saude nian hare katak stock out laos deit iha hospital nasional, maibe iha sentru saude no hospital referral sira iha munisipiu.

Iha parte seluk, Diretor Executivu Servisu Autonomia Medikamentu Ekipamentu Saude (SAMES), Santana Martins rekonhese akontese stok out ba medikamentu tanba kuaze 36,6% husi total 450 items medikamentu neebe presiza tuir lista mak laiha.

Nia dehan, iha tinan kotuk 2020, liu-liu akordu entre governu no UNDP hatama duni ai-moruk emergensia items balun ligadu ho COVID-19, maibe ho kuantidade neebe kiik tanba nee stock out.*

Reportajen: Jeniche da Costa
Editora: Carme Ximenes

LEAVE A REPLY

Please enter your comment!
Please enter your name here