DILI, STLNEWS.co – Tuir Diretor Servisu Nasional ba Ambulansia no Emerjensia Medika (SNAEM), Horacio Sarmento informa, konaba ambulansia no kareta multifunsaun nee iha sentru saude sira iha munisipiu nee iha hotu kedas.
Nia dehan, kareta ambulansia no kareta multifunsaun nee nia marka hanesan hotu deit.
“Konaba kareta multifunsaun nee iha munisipiu sira iha hotu kedas, maibe iha problema mak ambulansia nee iha munisipiu sira kuaze ida-ida deit, mak hanesan Likisa, Same, Aileu, Ermera sira nee kuaze ida-ida deit, maibe kareta multifunsaun nee iha munisipiu sira kuaze iha hotu,” tenik nia ba jornalista sira iha Ministeriu Saude, Kaikoli, Segunda nee (25/07/2022).
Dala ruma Dili husu apoiu ba sira tula moras husi munisipiu mai Dili, karik iha Dili problema. Agora daudaun ambulansia iha Ermera mak problema, aat iha semana kotuk, dehan atu hadia mos la diak ona, tanba teknika sira analiza gastus barak liu, neebe la presiza atu hadia.
Aleinde nee mos Primeira Visi Diretor HAK, Filomena Barros dos Reis informa, bainhira ambulansia sira aat nee, haree no rezolve ho lalais para bele transporta moras sira husi hospital referal no sentru saude sira mai iha Dili.
“Se ambulansia mak aat tiha no balun halo hela reparasaun mak seidauk diak, nee sai problema,” dehan nia.
(nat)
