Armajena Central Preparadu Simu Vasina COVID-19

Diretor Jeral Servisu Autonomia Medikamentu no Ekipamentu Saude (SAMES), Santana Martins. (Foto: STL/Jeniche da Costa)

DILI, STLNEWS.co – Diretor Jeral Servisu Autonomia Medikamentu no Ekipamentu Saude (SAMES), Santana Martins hateten, sira halo ona instalasaun ba fatin cold storage iha armajen central hodi halo armajenamentu ba produtu vasina COVID-19, neebe tuir planu too iha Timor-Leste iha loron 27 fulan Marsu.

Nia dehan, desizaun governu nian atu introdus vasina AstraZeneca, no faze primeiru 20% kapasidade cold storage bele akumula hodi distribui ba iha fatin sira neebe difini ona hanesan sentru vasina nian.

“Ita nia armajen central prontu ona atu simu vasina COVAX neebe sei mai, inklui produtu seluk relasiona ho implementasaun vasina hanesan seringa, safety box atu tau seringa uzado sira, no ai-moruk sira neebe kontra reasaun sekundario sira,” nia hateten iha servisu fatin Kampung Alor, Kuarta (03/03/2021).

Nia esplika, armajen agora dadaun iha hela cold storage ida neebe iha laran iha cell room ho temperatura entre +2ᵒC too +8ᵒC, nee espasu iha hela. No iha mos hela freezer room ho temperatura -15ᵒC to’o -25ᵒC atu bele reponde ba implementasaun vasina.

Nia infroma, sira mos halo ona proposta ba governu atu bele instala tan cold storage iha armajen regional Baucau, Ainaro, Maliana no Rejiaun Espesial Administrativu Oecusse-Ambeno (RAEOA), tanba vasina nee sei mai ho kuantidade boot iha faze segundu.

“Intermus logistika importante maka bele iha konsiderasaun ba ami nia pedidu sira atu halo expansaun armajen vasina iha fatin hat, no transporte cold box atu fasilita transportasaun produtu nee ho diak,” nia infroma.

Iha oportunidade nee nia mos preokupa ho atendimentu eletrisidade, neebe durante nee mate lakan tanba bele fo implikasaun ba kualidade vasina.

Xefe Departamentu Promosaun Saude, Iha Ministerio da Saude, Misliza Vital dehan, publiku tenke komprende diferensia entre ai-moruk no vasina tanba ai-moruk atu halo tratamentu ba moras hodi kura, maibe vasina atu prevene moras.

“Vasina en jeral nuudar substansia neebe bele hasae ita nia imunidade proteje ba moras balun,” nia esplika.

Nia dehan, kualker vasina bele kauza efeitu sekundariu ba ema balun, hanesan mos vasina COVID-19 tanba nee efeitu sekundariu husi vasina ida nee maka sente moras iha kabas sona fatin, sente kolen, isin moras no isin manas, maibe la signifika suspeitu ba COVID-19.

Nia informa tuir planu lansamentu vasina COVID-19 sei halao iha loron 7 fulan Abril tinan 2021, hanesan loron mundial ba saude.

Nia afirma, iha faze primeiru pesoal servisu lina ferente sira maka sei hetan vasina, no populasaun munisipiu Dili, Covalima, Bobonaro no RAEOA neebe sofre moras kronika hanesan moras respirasaun kronika, moras fuan, diabetes no seluk tan.*

Reportajen: Jeniche da Costa
Editor: Ekipa STL

LEAVE A REPLY

Please enter your comment!
Please enter your name here