Asidente-Insidente, Mate 48

Portavoz Komando Jeral Polisia Nasional Timor-Leste (PNTL) Arnaldo Araujo. (Foto: STL/Efizenia da Costa)

DILI, STLNEWS.co – Durante fulan Janeiru to fulan Setembru, PNTL rejistu asidente no insidente neebe hamate ema nia vida hamutuk 48.

Portavoz Komando Jeral Polisia Nasional Timor-Leste (PNTL) Arnaldo Araujo, hatoo kestaun nee ba jornalista sira liu husi konferensia imprensa, iha salaun enkontru Komjer Caicoli, Dili, Kuarta (23/09/2020).

Nia dehan, situasaun jeral iha teritoriu Timor laran, agora dadaun lao hakmatek, maibe insidente neebe akontese iha loron 15 to 25 Setembru hamutuk 48, neebe mosu hanesan violensia domestika, ema baku malu, tuda malu, ka asaltu malu ou estragus sasan, tanba nee ho violensia domestika nee mak domina.

Arnaldo mos informa asidente neebe mosu iha rai laran, neebe rezulta ema mate no sira seluk kanek kman, iha mos kanek todan enkuantu mate mak 48 nee.

“Ita haree ba sidente sira neebe mosu iha fulan Janeiru to Setembru nee hamutuk 48 asidente, rezulta ema mate nomos ema kanek, barak liu mak minoridade tanba sira utiliza motor Beat, tanba nee mak hamosu bebeik dezastre barak ba ita nia juventude sira,’ dehan nia.

Tanba nee nia husu ba inan aman sira, atu tau atensaun ba oan sira banhira sira atu halo viajem ba dook ka besik ruma, tenke kuidadu, nunee labele sai vitima ba seksaun motor nee rasik.

Enkuantu agora dadauk iha Munisipiu Dili nomos iha Munisipiu 13 nee hotu halao hela check point ba transporte sira hanesan roda haat no roda rua. Nee duni husu ba ema hotu atu bele fo atensaun ba dokumentus kareta no motor nian, nunee labele afeta ba ema neebe konduz transporte, tanba polisia agora halo ona check point makas.

Reportajen: Efizenia da Costa
Editora: Carme Ximenes

LEAVE A REPLY

Please enter your comment!
Please enter your name here