Atendimentu Vera Cruz Ho Lahane Hanesan HNGV

DILI, STLNEWS.co – Atendimentu saude iha izolamentu Vera Cruz no izolamentu Lahane hanesan ho Hospital Nasional Guido Valadares (HNGV), diferente deit mak Covid-19 ho non Covid-19.

Kestaun nee informa husi Diretor Ezekutivu Hospital Nasional Guido Valadares (HNGV), Alito Soares ba jornalista sira iha Parlamentu Nasional (PN), Kinta nee (26/08/2021).

“Hau atu dehan deit katak, atendimentu klinika nee naran deit mak la hanesan, Vera Cruz no Lahane, maibe naran HNGV hotu, tanba ita nian ekipa neebe ba halo atendimentu nee husi HNGV mak ba hotu neeba, laiha diferensia entre HNGV no Vera Cruz ho Lahane, ita haree diferente mak Covid-19 no non Covid-19,” dehan Alito.

Nia katak, pasiente neebe kritiku no moderadu, nee ninia atendimentu kliniku mak atu asegura ema nia moris nee hanesan.

“Ita nia mediku iha HNGV mak sei halo servisu iha Vera Cruz no Lahane hanesan, tanba sira halo rotasi kada departamentu nee sira jere, sira nia oras servisu,” nia dehan.

Tanba nee laiha diferente atendimentu iha Vera Cruz no Lahane, maibe iha sala operasaun iha Vera Cruz nee mak fatin kiik oituan, maibe responde ba situasaun urjente nee diak hela, tanba durante nee halao hela operasaun.

Aleinde nee, iha Hospital Nasional Guido Valadares (HNGV), hanesan mos fasilidade iha Timor laran tomak, konaba atendimentu klinika nee difini, katak pasiente neebe mai ho kondisaun neebe grave ka emerjensia nee HNGV sempre atende lalais ho  urjente. Tanba atu salva ema nia vida ou salva nia orgaun neebe afeita, nee klaru tiha, kuandu nia grave, tenke atendimentu urjente.

“Kazu grave nee ita tenke atende lalais, ida nee mak ita halo hela, karik hanesan kazu inan isin rua sira mai ho grave no atu halo operasaun ida nee ita la hein, dehan swab nian rejultadu sai mak foin halao opera, nee lae,” tenik nia.

Nia informa, ekipa iha sala operasaun numeru 1 neebe durante nee prepara halo opera, uza ekipamentus hodi prevensaun ba covid-19 nee  kompletu, no sira halo atendimentu ba kazu sira neebe isin rua, no nia laos kondisaun risku no laiha afeita ba vida moris.

Entretantu Koordenador Pilar 7, Nilton do Carmo dehan, atendimentu ba pasiente esensial loron – loron nian iha sala izolamentu Vera Cruz no Lahane lao nafatin.

“Ita nia numeru pozitivu kontinua makaas, maibe atendimentu ba ita nia pasiente Covid-19 mos lao nafatin, ho ninia diferente mak hanesan sira neebe ita konsulta, mak laos emerjensia sira pendente, mais sira neebe urjente sira mos tau prioridade ba iha neeba,” nia afirma.

Dadus neebe STL asesu iha terenu, iha mediku sira neebe fo atendimentu ba pasiente Covid-19 iha izolamentu Vera Cruz iha 45 pesoas, ida nee fahe ba grupu tolu, nomos Lahane iha mediku jeral no infermeiru ba iha medisina interna, hamutuk nain 4.*

Reportajen: Jeniche da Costa

Editor: Ekipa STL

LEAVE A REPLY

Please enter your comment!
Please enter your name here

NEWS UPDATE

KM Aprova Dekretu Lei Apoiu Nesesidade Baziku Ba Funsionariu Publiku

DILI , STLNEWS.co – Konsellu Ministru (KM) halao sorumutu iha Palasiu Governu aprova ona projetu dekretu-lei, atu kria subsidiu mensal ai-han nian ba funsionariu...

MAE Fo Pose Ba Prezidente Autoridade Munisipiu Dili

DILI, STLNEWS.co – Governu liu husi Ministeriu Administrasaun Estatal (MAE), fo pose ba Prezidente Autoridade Munisipiu Dili foun. Ministru Administrasaun Estatal (MAE) Miguel Pereira de...

Update Covid-19 TL 20 Setembru: Kazu Positivu 25, Rekuperadu 127 & Obitu 1

DILI, STLNEWS.co – Sentru Integradu Jestaun Krize (SIJK) ohin relata kazu positivu iha ema nain 25, rekuperadu 127 no obitu nain 1. "Kazu detetadu foun neebe...
%d bloggers like this: